Memleket basshysy: Bizge parlamenttik oppozıtsııa ınstıtýty qajet

NUR-SULTAN. QazAqparat – Bizdiń qoǵam partııa qurylysynyń jańa sapalyq kezeńine ótetindeı dárejege jetti. Búgin Ulttyq qoǵamdyq senim keńesiniń 2-otyrysynda QR Prezıdenti Qasym-Jomart Toqaev osylaı málim etti, dep habarlaıdy QazAqparat tilshisi.

«Bizge parlamenttik oppozıtsııa ınstıtýty qajet. Biz jańa qoǵamdyq paradıgmanyń basty sharty balama kózqarastar men pikirler ekenin túsinýimiz kerek. Sońǵy jyldary óz ustanymdaryn ashyq bildirip júrgen belsendi azamattar birqatar áleýmettik-ekonomıkalyq máselelerdi sheshýge atsalysty. Biz balama pikirler men qoǵamdyq talqylaý toqyraýdyń bastaýy emes, kerisinshe, damýdyń basty talaptarynyń biri ekenine kóz jetkizdik», - dedi Prezıdent.

Memleket basshysynyń atap ótýinshe, «Parlament týraly» Zańdy saıası azshylyqqa kepildik beretin normalarmen tolyqtyrý qajet.

«Sondyqtan Parlamenttegi saıası azshylyqtyń negizin zań júzinde bekitý qajet. Bul úshin «Parlament týraly» Zańdy saıası azshylyqqa kepildik beretin normalarmen tolyqtyrý qajet. Mysaly, basqa da partııalardyń ókilderi Parlamenttegi keıbir komıtetterdiń tóraǵasy laýazymdaryn ıelene alatyndaı jaǵdaı jasaý kerek. Bul bıliktiń zań shyǵarý tarmaǵyndaǵy balamaly qyzmettiń júıeli jumysyn qamtamasyz etýge múmkindik beredi», - dedi Q. Toqaev.