Memleket basshysy: Bizdiń ishki turaqtylyǵymyz – elimizdiń odan ári damýynyń mańyzdy sharty
«Qýatty jáne qarqyndy damý jolyna túsken memleket azamattardyń quqyqtaryna jáne olardyń erkindigine myzǵymas kepil bolady. Halqy jasampaz, otanshyl jáne eńbekqor el ǵana tolaǵaı tabysqa jeteri anyq. Sondyqtan, bizdiń osy joldaǵy baǵdarymyz – barshaǵa aıqyn. «Adam memleket úshin emes, memlekettiń ıgiligi adam úshin» qaǵıdasy basty ustanymǵa aınaldy. Memlekettiligimizdi odan ári nyǵaıtamyz desek, bizge, eń aldymen, ózara jaýapkershilik jáne tilektestik ıdeologııasy asa qajet. Sebebi, egemen elimizdiń taǵdyry – ár azamattyń qolynda. Bul – úlken borysh. Osyny tereń túsinýimiz kerek. Endi elimizge barsha halyqqa túsinikti bolatyn jáne shyn máninde, azamattarymyzdyń suranysyna saı keletin ıdeologııa qajet. Ashyǵyn aıtqanda, bizge jasandy qaǵıdalar emes, barsha azamattardyń kóńilinen shyǵatyn, olardyń júregine jyly tıetin shynaıy ómirde qajet bolatyn durys baǵyt-baǵdar kerek. Búginde halqymyz bir el bolyp jumylyp, tutastyqta ómir súrip jatyr. Bul, árıne, qýantarlyq jaǵdaı», - QR Prezıdenti.
Sondaı-aq Prezıdent ishki turaqtylyǵymyz – elimizdiń odan ári damýynyń mańyzdy sharty ekenin aıtty.
«Bizdiń ishki turaqtylyǵymyz – elimizdiń odan ári damýynyń mańyzdy sharty jáne eýrazııalyq qaýipsizdikti qamtamasyz etetin faktor. Qazaqstan dúnıe júzine ozyq damýǵa bet alǵan jáne barsha álemge ashyq memleket retinde, sondaı-aq Birikken Ulttar Uıymynyń Jarǵysy negizinde halyqaralyq qatynastardyń ádiletti júıesin qurýdy kózdegen el retinde tanymal. Konstıtýtsııa – memlekettigimizdiń kepili. Soǵan sáıkes elimizdiń árbir azamaty birtutas Qazaqstan halqynyń ajyramas bóligi ári el taǵdyryna yqpal etetin qoǵam múshesi. Ata zańymyz ár adamǵa osyndaı quqyq berip otyr», - dep atap ótti Memleket basshysy.
