Memleket basshysy: Biz - álemdegi eń jas halyqtardyń birimiz
ASTANA. QazAqparat - Qazaqstan halqynyń ortasha jasy 26 jasty quraıdy. Bul týraly búgin «Mereıli otbasy» ulttyq baıqaýynyń jeńimpazdaryn marapattaýǵa arnalǵan saltanatty shara barysynda Elbasy Nursultan Nazarbaev aıtty.
«Biz - álemdegi eń jas halyqtardyń birimiz. El turǵyndarynyń ortasha jasy - 26 jas. AQSh-ta bul kórsetkish - 36, Eýropa odaǵynda - 41 jas. Barlyq kórsetkishter boıynsha biz - ósip-órkendep kele jatqan, jalpy alǵanda jas elmiz. Bul - bizdiń bolashaǵymyzdyń zor ekendigin kórsetedi jáne kezine durys tańdaý jasap, qazir durys baǵytta bet alǵanymyzdyń aıqyn kórinisi», - dedi N.Nazarbaev.
Aıta keteıik, marapattaý rásimine aımaqtyq týrlardan jeńip shyqqan 16 otbasy qatysady. Jalpy, konkýrsta elimizdiń barlyq óńirlerinen 1 298 otbasy baq synaǵan bolatyn.
