Memleket basshysy: Bıyldan bastap Respýblıka kúni – ulttyq mereke

ASTANA. QazAqparat - Aqordada Prezıdent Qasym-Jomart Toqaevtyń qatysýymen Respýblıka kúnine oraı memlekettik nagradalar men syılyqtar tapsyrýǵa arnalǵan saltanatty rásim ótip jatyr, dep habarlaıdy Aqorda.

«Men Ulytaýda ótken alqaly jıynda Respýblıka kúnine ulttyq mereke mártebesin qaıtarýdy usyndym. Ony Qazaqstannyń basty meıramy retinde atap ótý týraly bastama kóterdim. Bul bastama halyqtyń keń qoldaýyna ıe bolyp, tıisti zańǵa ózgeris engizildi. Bıyldan bastap Respýblıka kúni – ulttyq mereke. Endi bul meıramdy kúlli el bolyp jańa mazmunda atap ótetin bolamyz. Qaıta jańǵyrǵan Respýblıka kúni – bul halqymyzdyń rýhyn kóterip, eldigimizdi nyǵaıta túsetin asa mańyzdy tarıhı qadam. Sondyqtan, osy mereıli kún azamattarymyzdyń ózara túsinistigin, tutas ultymyzdyń erkin ómirge jáne derbes damýǵa umtylysyn pash etetin mereke bolmaq. «Respýblıka» sózi latyn tilinde «ortaq is» degen maǵyna beretini barshamyzǵa belgili. Bir sózben aıtqanda, respýblıka óz isine jaýapty azamattardyń ortaq is-áreketiniń arqasynda qurylady. Óıtkeni, azamattar – memlekettiń arqaýy. Azamattary bolmasa, memleket te bolmaıdy», - dedi QR Prezıdenti.

Sonymen qatar Memleket basshysy Egemendik deklaratsııasyna toqtaldy.

«Egemendik deklaratsııasyn halyqtyń jan-jaqty jáne uzaq jylǵy kúresiniń nátıjesi deýge bolady. Árıne, mundaı qadamǵa barý ońaı bolǵan joq. Elimizdiń sol kezdegi saıası-áleýmettik jáne demografııalyq ahýaly turǵysynan qarasaq, bul óte batyl áreket bolatyn. Egemendik deklaratsııasy – táýekel men dıplomatııanyń, aqyl men sabyrdyń jemisi. Osy tarıhı qujattyń áseri kóp uzamaı baıqala bastady. Biz qoǵamnyń irgetasyn jańartyp, jańa belesterge umtyldyq. Qazaqstan qıyn ótkelden ótip, irgeli el bolýǵa baǵyt ustady», - dedi Memleket basshysy.