Memleket basshysy biryńǵaı kólik júıesiniń artyqshylyǵyn atady
«EAEO jahandyq naryqtardyń qıylysynda ornalasqan. Bul baǵyttaǵy áleýet orasan zor. Qazirgi tańda ekonomıkalyq odaq Shyǵys pen Batysty baılanystyratyn mańyzdy kóliktik torabyna aınaldy. Bul artyqshylyqty durys paıdalaný kerek. Qytaı – Eýropa – Qytaı baǵyty boıynsha eksporttyq jáne ımporttyq, tranzıttik operatsııalardyń turaqty ósimi baıqalady. Bizdiń taýarlardy ASEAN elderine jyljytý boıynsha logıstıkalyq máselelerdi sheshetin «Vetnam – Qytaı – Qazaqstan – Eýropa» baǵytyndaǵy transqurlyqtyq temir jol baǵdary iske qosyldy. Atalǵan kóliktik dáliz teńiz joldaryndaǵy tasymaldarǵa sátti balama bola alady, Ońtústik-shyǵys Azııadan Eýropaǵa qysqa ýaqyttyń ishinde júkterdi EAEO memleketteriniń aýmaǵy arqyly ákelýge múmkindik beredi», - dedi Qasym-Jomart Toqaev Erevanda ótip jatqan Joǵary Eýrazııalyq ekonomıkalyq keńestiń otyrysynda.
Prezıdent osynaý múmkindikterge qaramastan, kontrsanktsııaly tizimge engen taýarlardyń tranzıtine qatysty qıyndyqtar týyndaıtynyn atap ótti.
«Bunyń bári bizdiń elderdiń ózara da, úshinshi eldermen yntymaqtastyǵyna da jaısyz tıedi. Jasalyp jatqan tranzıttik júıe ekonomıkalyq odaq aýmaǵynda kedergisiz tranzıtke, kedendik protsedýralardy jyldamdatýǵa jaǵdaı jasaıdy. Komıssııa men bizdiń Úkimetter EAEO elderiniń biryńǵaı kóliktik júıesin ázirleýdi jedeldetýi tıis», - dedi Memleket basshysy.
Aıta ketsek, Qazaqstan Prezıdenti Qasym-Jomart Toqaev qatysqan Joǵary Eýrazııalyq ekonomıkalyq keńestiń otyrysy «Habar 24» arnasynda tikeleı efırde kórsetildi.
Armenııa astanasynda Joǵary ekonomıkalyq keńestiń otyrysy ótip jatyr. Іs-sharaǵa Qazaqstan Prezıdenti Qasym-Jomart Toqaev, Belarýs Respýblıkasynyń Prezıdenti Aleksandr Lýkashenko, Qyrǵyz Respýblıkasynyń Prezıdenti Sooronbaı Jeenbekov, Reseı Federatsııasynyń prezıdenti Vladımır Pýtın, Armenııanyń Premer-mınıstri Nıkolaı Pashınıan jáne Eýrazııalyq ekonomıkalyq komıssııa Alqasynyń tóraǵasy Tıgran Sarkısıan qatysýda.
