Memleket basshysy: Bárimizdiń azamattyq jaýapkershiligimiz osyndaı sátte synalady
NUR-SULTAN. QazAqparat – Memleket basshysy Qasym-Jomart Toqaev koronavırýs indetimen kúresýge Qazaqstannyń tolyq múmkindigi baryn málimdedi, dep habarlaıdy QazAqparat tilshisi.
«Bul qıyndyqty bárimiz bir halyq, bir qoǵam bolyp mindetti túrde eńserip shyǵamyz. Bul ýaqytsha dúrbeleń. Osy daǵdarystan abyroımen ótýimiz kerek. Engizilgen shekteýlerge ár azamat jaýapkershilikpen qaraýy tıis. Ár adam barynsha saqtanyp, vırýstyń taralmaýyna atsalysýy qajet. Elimizdiń barlyq azamaty ókiletti organdardyń qyzmetine qolǵabys kórseter dep senemin», - dedi Prezıdent Qazaqstan halqyna úndeýinde.
Memleket basshysy osyndaı kezde bárimiz sabyr saqtap, tártipke baǵynýymyz kerek ekenin eske saldy.
«Derttiń alǵashqy belgisi baıqalǵanda birden turǵylyqty jerdegi dárigerge qaralý qajet. Bárimizdiń azamattyq jaýapkershiligimiz osyndaı sátte synalady. Biz ekonomıkalyq jaǵdaıdy basty nazarda ustaımyz. Memleket barlyq áleýmettik mindettemelerin oryndaıdy. Elbasynyń sarabdal saıasatynyń arqasynda buǵan qajetti qorymyz qalyptasty. Qarajat bar. Osy oraıda azyq-túlik qory jetkilikti ekenine nazar aýdarǵym keledi. Kúndelikti tutynatyn taýar baǵasyn negizsiz qymbattatýǵa jol berilmeıdi. Biz el jurtty dúrliktirip, arandatatyn áreketterge tyıym salamyz. Jalǵan aqparat taratyp dúrbeleń týǵyzatyndar zańǵa sáıkes jaýapqa tartylady», - dedi ol.
Esterińizge sala ketsek, QR Prezıdentiniń Jarlyǵymen Dúnıejúzilik densaýlyq saqtaý uıymynyń jańa COVID-19 koronavırýsyn pandemııa dep jarııalaýyna baılanysty azamattardyń ómiri men densaýlyǵyn qorǵaý maqsatynda Qazaqstan Respýblıkasynyń barlyq aýmaǵynda 2020 jylǵy 16 naýryz 08 saǵat 00 mınýt pen 2020 jylǵy 15 sáýir 07 saǵat 00 mınýt aralyǵynda tótenshe jaǵdaı engizildi.
