Memleket basshysy Azıadada sportshylar qazaqstandyqtardyń úmitin aqtap, joǵary deńgeıde óner kórsetetinine senim bildirdi
ASTANA. 21 qańtar. QazAqparat - Búgin Qazaqstan Respýblıkasynyń Prezıdenti Nursultan Nazarbaevtyń tóraǵalyǵymen 2011 jylǵy 7-Qysqy Azııa oıyndaryna daıyndyq jáne ony ótkizý jóninde keńes ótti, dep habarlaıdy QR Prezıdentiniń baspasóz qyzmeti.
Keńes barysynda 2011 jylǵy 7-Qysqy Azııa oıyndaryna daıyndyq, onyń ishinde 7-Qysqy Azııa oıyndaryn ótkizýge Astana men Almaty qalalarynyń daıyndyǵy, rásimniń ashylýy men jabylýy máseleleri talqylandy.
Keńeste Týrızm jáne sport mınıstri T. Dosmuhambetov, Astana qalasynyń ákimi I. Tasmaǵambetov pen Almaty qalasynyń ákimi A. Esimov sóz sóıledi.
- Kúlli álem aldaǵy jarys barysyna erekshe kóńil qoıatyn bolady. Bizdiń aldymyzda Azıadany joǵary halyqaralyq deńgeıde ótkizý mindeti tur. Bizdiń elimizde Azııa oıyndaryn ótkizý - bul Qazaqstannyń álemdik sport qozǵalysyndaǵy halyqaralyq bedeliniń kórsetkishi. Óz jalaýy astyna Azııanyń 27 eliniń sportshylaryn jınaıtyn Azııa birinshiligin jeke sport túrleri boıynsha ótkizý bir basqa da, Azııadany ótkizý múlde bir basqa, - dep atap ótti Memleket basshysy.
Týrızm jáne sport mınıstri T. Dosmuhambetovtyń aqparaty boıynsha, Azııa oıyndarynyń sporttyq básekesinde barlyǵy 69 jıyntyq medal oınalady.
Búginde jańa sporttyq nysandardyń, máselen, konkımen júgirý stadıony, velotrek, shańǵymen sekirý kesheni, «Soldat saıynda» shańǵy-bıatlon stadıony, Astana qalasyndaǵy «Qazaqstan» sport saraıyndaǵy muz alańynyń qurylysy tolyq aıaqtalǵan.
«Medeý» muz aıdyny, «Tabaǵan» sporttyq oıyn-saýyq kesheni, «Shymbulaq» taý-shańǵysy bazasy, B. Sholaq atyndaǵy sport saraıyndaǵy syrǵanaq muz aıdynynyń qurylysy jáne Almaty qalasynda 650 oryndyq avtoturaq qaıta jóndeýden ótkizildi.
Azıada oıyndary ótetin barlyq sporttyq ǵımarattar jańa tehnologııa qoldanyla otyryp, álemdik standarttarǵa sáıkes jáne Astana men Almaty qalalarynyń sáýletkerlik bezendirilýine saı salyndy.
Qazirdiń ózinde Azııa Olımpıadalyq Keńesine múshe elder bizdiń sporttyq bazany jarystar ótkizý, oqý-jattyǵý jıyndaryn jáne Sochıdegi qysqy Olımpıadalyq oıyndarǵa sportshylardy daıyndaý úshin paıdalaný nıetinde.
Búgingi kúni 27 el ózderiniń Azıadaǵa qatysatyndyqtaryn qýattady. Ótinish bildirgen sportshylar men resmı adamdardyń jalpy sany 4 myń 135 adam.
Memleket basshysy otyrystyń qorytyndysy boıynsha Azıadanyń barlyq sporttyq nysandarynyń halyqaralyq federatsııa usynǵan talaptarǵa sáıkestigin tekserýdi tapsyrdy.
- Bul biregeı sporttyq ǵımarattar Qazaqstannyń ulttyq jetistigi bolýy qajet. Tek bolashaq olımpıadashylarǵa qyzmet etip qana qoımaı, buqaralyq sportty damytýdyń ortalyǵyna aınalýy kerek, - dep qadap aıtty Prezıdent.
Memleket basshysy Azııa oıyndarynyń ashylý jáne jabylý rásimderine erekshe kóńil bólýge shaqyrdy jáne barsha qazaqstandyqtar úshin aldaǵy oıyndardyń jaǵymdy rólin atap kórsetti.
- Azıada elimizdiń ishki ómirinde sport men salamatty ómir saltyn nasıhattaý, patrıotızmge tárbıeleý kózqarasy turǵysynan alǵanda úlken mańyzǵa ıe, - dedi Nursultan Nazarbaev.
- Qazaqstan -Olımpıada oıyndarynyń, Álem birinshiliginiń jáne Azııa oıyndarynyń 117chempıondaryn tárbıelegen el. Olardyń tabystary bizdiń memleketimizdiń mereıin tasytady. Biz Japonııa, Qytaı jáne Qoreıa quramalary kúshti básekeles bolatynyn túsinemiz. Osy jaǵdaıǵa qaramastan, biz aldymyzǵa úlken mindet - medaldar alý jóninen úshtik kóshbasshylar qatarynan kóriný mindetin qoıamyz, - dedi Nursultan Nazarbaev.
Memleket basshysy sportshylar qazaqstandyqtardyń úmitin aqtap, joǵary deńgeıde óner kórsetetinine senim bildirdi.
