Memleket basshysy Ázerbaıjan Prezıdenti Ilham Álıevpen kezdesti
Nursultan Nazarbaev Ázerbaıjannyń tuńǵysh prezıdenti Geıdar Álıevtiń kezinde bastalǵan Kaspııdiń quqyqtyq mártebesin retteý úderisi búginde tıisti Konventsııaǵa qol qoıý arqyly óziniń logıkalyq máresine jetkenin atap ótti.
Qazaqstan Prezıdenti keshe óńirdegi barlyq elder, sonyń ishinde Ázerbaıjan úshin jańa kólik-logıstıkalyq múmkindikter beretin eleýli oqıǵa - Quryq porty mýltımodaldy habynyń ashylǵanyn aıtty.
- Biz búkil Qazaqstan arqyly júrip ótetin temir jol jáne 6 avtomobıl jolyn saldyq. Sonyń ishinde eki jol Qytaımen shekarada ornalasqan. Tynyq muhıtynyń Lıanıýngan portynda logıstıkalyq termınal turǵyzyp, búkil Qazaqstan arqyly ótetin zamanaýı avtoban saldyq, - dedi Memleket basshysy.
Ilham Álıev Nursultan Nazarbaevty Kaspııde mýltımodaldy habtyń ashylýymen, sondaı-aq Qazaqstannyń qarqyndy damyp kele jatqanyn kórsetetin zor jetistiktermen quttyqtady.
- Men baýyrlas Qazaqstan jerine taǵy da kelgenime qýanyshtymyn. Mańǵystaý óńiri bizge tarıhı jaǵynan da, geografııalyq turǵydan da jaqyn. Quryq portynyń jańa múmkindikteri yntymaqtastyǵymyzdy odan ári nyǵaıta túsedi, - dedi Ázerbaıjan Prezıdenti.
I.Álıev bıylǵy mamyr aıynda kólik legi ıntegratsııasyn tolyq qamtamasyz etetin Alıak portynyń ashylǵanyn atap ótip, eki eldiń tranzıt múmkindigin paıdalanýdyń saıası jáne ekonomıkalyq tıimdiligine toqtaldy.
- Kaspıı syrtqy kólik kúre tamyryna aınaldy. Kóptegen kúrdeli máseleler jóninde kelisimge qol jetkizý isindegi Sizdiń rólińizdi erekshe atap ótkim keledi. Biz Konventsııanyń barlyq erejeleriniń oryndalýyna, Kaspıı teńiziniń óńir turaqtylyǵyn ári qaraı da qamtamasyz ete berýine umtylatyn bolamyz, - dedi Ázerbaıjan Respýblıkasynyń Prezıdenti.
