Memleket basshysy Astanadaǵy №85 mektep-lıtseıin ashty
Jańa mektep Qazaqstan men Arab memleketiniń halyqaralyq yntymaqtastyǵyn damytý sheńberinde Katar Memleketiniń Damý qorynyń qoldaýymen salynǵan.
Bilim ordasynyń jobalyq qýaty 1200 orynǵa arnalǵan. Jańa bilim ordasynda eki aýysymda jumys jasaý josparlanǵan. Mektepte 48 oqý kabıneti bar. Baǵyty - jaratylystaný-matematıkalyq. Oqytý qazaq jáne orys tilderinde ótedi.
№85 mektep-lıtseıde oqytý memlekettik bilim berý standarttarynyń talaptaryna sáıkes, ınnovatsııalyq tehnologııalardy qoldaný arqyly júrgiziletin bolady. Úılesimdi jahandyq tulǵany tárbıeleý úshin lıngvıstıkalyq, ınklıýzıvtik saıasatty, akademııalyq adaldyq jáne baǵalaý saıasatyn ustaný kózdelgen.
1-11 synyptarda «Matematıka jáne oı damytý», «Robototehnıka», «Shahmat», «STEM», «Scratch» baǵdarlamalaý ortasy» atty lıtseı komponentteri oqýshylardyń jaratylystaný-matematıkalyq ǵylym salasyndaǵy bilimderin keńeıtýge baǵyttalǵan.
5-9 synyptarda gımnazııa komponentine «English Club», shyǵys tili jáne hımııa, bıologııa, fızıka, ınformatıka pánderdi aǵylshyn tilinde oqytý qosylady.
10-11-synyptarda «Bıznes negizderi», «Drama», «Oılaý dızaıny» jáne mamandandyrylǵan bilim berý kýrstary qosymsha engiziledi.
Aıta ketsek, jańa 2018-2019 oqý jylynda elordalyq 105 bilim ordalaryna (85 memlekettik, 1 keshki mektep, 15 jekemenshik jáne 4 respýblıkalyq deńgeıdegi mektepter) 160 myńǵa jýyq oqýshy sabaqqa barady. Onyń 18 myń balasy úshin qońyraý alǵash ret soǵylatyn bolady.
Birinshi sabaqtyń taqyryby elordamyzdyń 20 jyldyq mereıtoıyna arnalmaq. Balalarǵa Astana qalasynyń qalyptasý tarıhy, onyń damýy, kórikti jáne mańyzdy tarıhı oqıǵalar týraly baıandalady.
