Memleket basshysy Astana men Almaty qalalarynyń, oblystardyń ákimderimen keńes ótkizdi
ANA. Qazannyń 27-si. QazAqparat. - Elbasy Nursultan Nazarbaev Astana men Almaty qalalarynyń, oblystardyń ákimderimen keńes ótkizdi. Keńes jumysyna Premer-Mınıstr Kárim Másimov, Memlekettik hatshy-Syrtqy ister mınıstri Qanat Saýdabaev, Prezıdent Ákimshiliginiń Basshysy Aslan Mýsın qatysty,
dep habarlaıdy QR Prezıdentiniń baspasóz qyzmeti.
Memleket basshysy álemniń jetekshi ekonomıkasynyń turaqtaný belgileri baıqalyp otyrǵan kezeń qarsańynda, kómirsýtegi shıkizatyna, metalǵa baǵa kóterilip kele jatqanyn, sondaı-aq elimizdiń ishki jaǵdaıynyń qalyptasýy jaman emes ekenin atap ótti. Ekinshi toqsanmen salystyrǵanda, úshinshi toqsanda óndiris kólemi 4,3 paıyzǵa ósti, óńdeýshi ónerkásip - 15 paıyzǵa kóterildi. Taý-ken sektory men aýyl sharýashylyǵy salasynda qańtar men qyrkúıek aralyǵynda 4,7 paıyz jáne tıisinshe 1,7 paıyz ósim bary atap ótildi.
Daǵdarysqa qarsy is-sharalar 400 myńǵa jýyq, sonyń ishinde «Jol kartasy» aıasynda 260 myńǵa jýyq jumys ornyn ashýǵa múmkindikter týǵyzdy.
Bıylǵy jyly turǵyn úı-kommýnaldyq sharýashylyǵyn jańartý jóninde keń kólemde jumystar júrgizildi. Shamamen bir jarym myń áleýmettik ınfraqurylym nysany jóndeýden ótti. Júz shaqyrymdyq jol salyndy jáne jóndeý jumystary júrgizildi.
Memleket stýdentterge qoldaý kórsetti, osy maqsatta qosymsha 11 myń grant jáne 40 myń kredıt bólindi.
Nursultan Nazarbaev birqatar problemalarǵa, atap aıtqanda, «100 mektep, 100 aýrýhana» baǵdarlamasyn júzege asyrý barysyna basa nazar aýdardy. Bıylǵy jyly joba aıaqtalmaq. Alaıda, Ońtústik Qazaqstan oblysy boıynsha - 14, Qyzylorda oblysynda - 4, Astanada 1 mektep belgilengen merziminde berilmegen.
Mundaı jaǵdaılar aýrýhanalarda da kezdesýde. Aǵymdaǵy kezeńde bólingen qarajattyń tek 64 paıyzy ǵana ıgerilgen.
Memleket basshysy ákimderge qurylystyń sapasyna jáne nysandardyń belgilengen merzimde berilýine tıimdi baqylaýdy qamtamasyz etýdi tapsyrdy.
Budan basqa, Nursultan Nazarbaev 2011 jyly Qazaqstanda alǵash ret Azıada ótetinin atap ótti. Úkimetke, Almaty men Astana ákimderine bul máselege jaýapkershilikpen qaraý jáne barlyq josparlanǵan nysandardy belgilengen merzimde tapsyrýdy qamtamasyz etý mindeti júkteldi.
Keńestiń qorytyndysy boıynsha Memleket basshysy daǵdarysqa qarsy is-sharalardy oryndaý, «Jol kartasy» baǵdarlamasy jáne ózge áleýmettik-ekonomıkalyq mindetterdi júzege asyrý jóninde birqatar naqty tapsyrmalar berdi.
