Memleket basshysy Almatydaǵy ekinshi JEO-ny jańǵyrtýdy jýyq arada iske asyrýdy tapsyrdy
NUR-SULTAN. QazAqparat - QR Prezıdenti Qasym-Jomart Toqaev elektr energetıkasy salasyn damytý máseleleri jóninde keńeste Almatydaǵy ekinshi JEO-ny gazǵa kóshirý jobasyna arnaıy toqtaldy, dep habarlaıdy QazAqparat.
Memleket basshysy jıynda qýat beretin jańa kózderdi jańǵyrtýdyń jáne iske qosýdyń mańyzdylyǵyn atap ótip, Almatydaǵy ekinshi JEO-ny gazǵa kóshirý jobasyna arnaıy toqtaldy.
«Bul máseleniń strategııalyq máni bar. Almaty qalasynyń ekologııasy jáne turǵyndardyń turmys sapasynyń jaqsarýy atalǵan problemanyń sheshilýine baılanysty. Sondyqtan Úkimetke, «Samuryq-Qazyna» Ulttyq ál-aýqat qoryna ákimdikpen birlesip, ekinshi JEO-ny jańǵyrtý jobasyna qatysty máseleni túbegeıli naqtylaýdy jáne ony jýyq arada iske asyrýdy tapsyramyn. Muny odan ári soza berýge bolmaıdy», – dedi Qasym-Jomart Toqaev.
Memleket basshysynyń aıtýynsha, álemde ónerkásip pen ekonomıkany kómirteginen ada qylýdyń ornyqty úrdisi baıqalady. Eýropalyq odaqqa múshe elderde parnıktik gazdardyń qaldyǵyn 2030 jylǵa qaraı 55 paıyzǵa azaıtý josparlanýda. 2023 jyldan bastap Eýropalyq odaqta kómirtegi salyǵy («carbon tax») engiziledi. Bul qazaqstandyq ónimniń eksportyn edáýir qıyndatýy múmkin. Jańa jaǵdaılarǵa baılanysty taýarlarǵa qoıylatyn tehnıkalyq reglamentter, standarttar men talaptar ózgeredi.
«Álemdik damýdyń qazirgi kezeńinde kez kelgen eldiń mártebesi, bedeli, soǵan sáıkes halyqaralyq múmkindikteri, kóp jaǵdaıda, kómirtegiden ada álemdik ekonomıkaǵa qosqan úlesi boıynsha aıqyndalatynyn túsiný mańyzdy. Atap aıtqanda, bul – elimizdiń Ekonomıkalyq yntymaqtastyq jáne damý uıymyna qabyldaný múmkindigin anyqtaıtyn ólshemderdiń biri», – dedi Memleket basshysy.
