Memleket basshysy: Almatyda sheshilýge tıis kóptegen másele bar
«Almaty – Qazaqstannyń iri qalasy. 3 mıllıonǵa jýyq turǵyny bar. Elimizdiń qarjy jáne bıznes ortalyǵy. Degenmen Almatyda kóptegen ózekti másele, túıtkilder bar. Sondyqtan qalanyń damýyna aıryqsha nazar aýdaramyz. Oǵan qosa Almaty qalasynyń mańyna oblysqa qarasty eldimekender tyǵyz shoǵyrlanǵan. Kóptegen máseleni Almaty oblysymen birlese sheshýge týra keledi. Qurylys, ınfraqurylym, jer jáne basqa da salalar boıynsha birqatar ortaq másele bar. Amandyq bolsa, naýryz aıynda Almatyǵa baryp, arnaıy jınalys ótkizemiz», - dedi Qasym-Jomart Toqaev Úkimettiń keńeıtilgen otyrysynda Almaty qalasynyń ákimi Baqytjan Saǵyntaevqa qarata aıtqan sózinde.
Eske sala ketsek Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótkizildi. Onlaın formattaǵy jıynda eldiń áleýmettik-ekonomıkalyq damýynyń 2020 jylǵy qorytyndylary men aldaǵy jospary talqylandy.
