Memleket basshysy Almaty oblysyndaǵy Respýblıkalyq olımpıadalyq daıarlyq bazasyna bardy

ASTANA. QazAqparat - Memleket basshysy Almaty oblysyndaǵy Respýblıkalyq olımpıadalyq daıarlyq bazasyna bardy, dep habarlaıdy QazAqparat Aqordanyń baspasóz qyzmetine silteme jasap.

Týrızm jáne sport mınıstri Ermek Marjyqpaevtyń aıtýynsha:

Búginde atletıkalyq manej, muz arenasyn, kópfýnktsıonaldy sport zalyn, kórkem jáne sporttyq gımnastıka zalyn, ákimshilik ǵımaraty men qonaq úı salý jumystary aıaqtaldy.

Sonymen qatar júzý basseıniniń, jekpe-jek zalynyń, sporttyq atys alańynyń, trıbýnalary bar stadıon men sadaq atatyn orynnyń qurylysy aıaqtalyp keledi.

Prezıdent TMD-daǵy eń iri sport keshenderiniń biri sanalatyn ınfraqurylymdy aralap kórdi. Halyqaralyq standarttarǵa saı bul nysan 2300 sportshyǵa arnalǵan.

Memleket basshysyna atalǵan bazanyń biregeı ereksheligi týraly aıtyldy:

Munda oqý-jattyǵý sabaqtaryn, emdeý-saýyqtyrý sharalaryn, halyqaralyq jáne respýblıkalyq jarystar ótkizýge arnalǵan 9 jabyq sport ǵımaraty ornalasqan.

Budan bólek, jeńil jáne aýyr atletıka, voleıbol, basketbol, shaǵyn fýtbol, shaıbaly hokkeı, konkı sporty, boks, kúrestiń barlyq túrleri, jekpe-jek óneri, sý sportynyń túrleri, sporttyq oq atý, sadaq atý sekildi sporttyń 23 túri boıynsha olımpıadalyq rezerv pen ulttyq qurama komandalaryn daıarlaý josparlanyp otyr.

Prezıdentke atletıkalyq manej ben sportshylarǵa arnalǵan qonaq úı kórsetildi.

Qasym-Jomart Toqaev sportshylarmen áńgimelesti.

Prezıdent buqaralyq jáne balalar men jasóspirimder sportyn damytý mańyzdy ekenin atap ótti.

– Qazir negizgi kúsh-jigerdi Olımpıada men Azııa oıyndaryna, sondaı-aq ózge de eýropalyq, álemdik deńgeıdegi týrnırlerge daıyndalý úshin jumsaý kerek. Qazaqstan sport derjavasy bolýǵa tıis. Sol úshin biz mańyzdy sport nysandaryn salyp jatyrmyz. Qalashyqtyń sporttyq áleýetin arttyra berýimiz kerek, – dedi Qasym-Jomart Toqaev.

Kezdesý sońynda Memleket basshysy jas sportshylarǵa jańa jeńister tiledi.