Memleket basshysy Almaty oblysy ekonomıkasynyń mańyzdy salalaryn atap ótti
ASTANA. QazAqparat - Qazaqstan Respýblıkasynyń Prezıdenti Nursultan Nazarbaev Almaty oblysyna jumys sapary barysynda Taldyqorǵandaǵy qalalyq «Jastar» saıabaǵynda boldy.
Memleket basshysy saıabaqty jańartý jáne abattandyrý jumystary barysymen tanysty.
Qazaqstan Prezıdenti qala turǵyndarynyń mádenı-kópshilik demalysy úshin meılinshe jaǵdaı jasaýdyń mańyzdylyǵyna nazar aýdardy.
Sonymen qatar, Elbasy óńirdegi jurtshylyq ókilderimen kezdesti.
- Oblystyń shekara boıynda ornalasýy ekonomıkanyń kólik-logıstıka jáne elektr energetıkasy salalaryn damytý qajettigin talap etedi. Búginde memlekettik baǵdarlamalardyń iske asyrylyp, meniń tapsyrmalarymdy oblys ákiminiń tııanaqty oryndaýynyń arqasynda bul salalar qarqyndy damýda. Óńirdiń áleýmettik baǵdarlamalardy júzege asyrýdaǵy tabystaryn da aıtpaı ketýge bolmaıdy. Sonymen birge halqymyzdyń táýelsizdik jyldaryndaǵy basty jetistiginiń taǵy biri - beıbitshilik pen ultaralyq kelisimniń saqtalýy dep sanaımyn, - dedi Qazaqstan Prezıdenti.
Qala turǵyndary oblysqa qamqorlyǵy jáne halyqtyń ál-aýqatyn arttyrýǵa baǵyttalǵan tıimdi memlekettik saıasaty úshin Elbasyǵa alǵystaryn aıtty.
Sońynda Nursultan Nazarbaev barshaǵa zor densaýlyq jáne eńbekterine tabys tiledi.
Budan bólek, Qazaqstan Prezıdenti buqaralyq aqparat quraldarynyń ókilderi úshin Almaty oblysyna saparynyń qorytyndysy boıynsha brıfıng ótkizdi.
Elbasy óziniń 2014 jyly bergen tapsyrmalarynyń ýaqtyly oryndalyp jatqanyn atap ótti.
- Almaty oblysy - elimizdiń kórikti óńiriniń biri jáne aýyl sharýashylyǵy daqyldarynyń kóptegen túrin óndiretin asa mańyzdy aımaq, - dedi Nursultan Nazarbaev.
Sondaı-aq, Qazaqstan Prezıdenti qalanyń abattandyrylýy jaqsara túskenin aıtty.
- Jańa áleýmettik ınfraqurylym nysandarynyń paıdalanýǵa berilýi elimizdiń táýelsizdiginiń 25 jyldyǵy qarsańynda qala turǵyndary úshin tamasha syılyq boldy. Indýstrııalandyrý baǵdarlamasy men «Nurly jol» baǵdarlamasynyń odan ári iske asyrylýy ekonomıkamyzdyń damýyna, soǵan oraı halyqtyń turmys deńgeıiniń artýyna septigin tıgizedi, - dedi Memleket basshysy.
