Memleket basshysy áleýmettik salaǵa erekshe nazar aýdarýdy tapsyrdy

Elbasynyń aıtýynsha, ındýstrııalyq-ınnovatsııalyq jobalardyń tolyqqandy júzege asýy úshin olardy tyńǵylyqty irikteý kerek. Óıtkeni ótken jyly osyndaı problemalardyń saldarynan 7 joba alynyp tastalyp, 15 jobanyń iske qosylý merzimi keıinge shegerilgen bolatyn.

Sondaı-aq Memleket basshysy baǵanyń negizsiz ósýine, ásirese azyq-túlik baǵasynyń sharyqtaýyna jol bermeý qajettigin basa aıtty. Osy oraıda aýyl sharýashylyǵy taýaralaryn óndirýdi, saqtaýdy únemi jandandyryp otyrýǵa basa nazar aýdarý qajettigine nazar aýdartty. Oblys ortalyqtary aýmaǵynda Astanany úlgi retinde ala otyryp, azyq-túlik beldeýlerin qurý jumystaryn jandandyrý qajet atap ótti.

Kóktemgi egis naýqanyn sapaly júrgizý qajettigin de nazardan tys qaldyrmaǵan Elbasynyń atap ótýinshe, qazirgi ýaqytta ońtústik bul jumystarǵa kirisip ketken. Barlyq resýrs bólingen. Tehnıkalyq daıyndyǵy ótken jylǵa qaraǵanda joǵary. Aqsha, nesıe, sýbsıdııa bar.

Áleýmettik salaǵa erekshe nazar aýdarý qajettigin aıta kele N.Nazarbaev: «Birqatar óńirlerde tirkelgen jumyssyzdar sany ortasha respýblıkalyq deńgeıden asyp ketken. Men sizderdi sandarmen bastaryńyzdy aýyrtpaı-aq qoıaıyn. Ózderińiz mán-jaıdy qarańyzdar. Sonymen qatar bilikti jumys kúshi barlyq jerde, qurylysta, zaýytta jetispeıdi. Demek shyn máninde jumys bar, maman joq», - dedi.