Memleket basshysy álemniń ár qıyryndaǵy qazaq jastaryn atamekenge oqýǵa jáne qazaq eline qyzmet etýge shaqyrdy
ASTANA. 25 mamyr. QazAqparat /Qanat Mámetqazyuly/ - Búgin Astanada ótip jatqan Dúnıejúzi qazaqtarynyń IV Quryltaıynda sóılegen sózinde Memleket basshysy Nursultan Nazarbaev Bilim jáne ǵylym mınıstrligine Qazaqstanda oqyǵysy keletin sheteldik qazaq jastaryna kvota bólýdi tapsyrdy.
«Shetelden kelgen quryltaıǵa qatysýshylardyń basym kópshiligin jastar quraıdy. Jastar - bizdiń bolashaǵymyz. Sondyqtan álemdegi barsha qazaq jastarynyń sapaly bilim alýyna tıisti jaǵdaı jasaýymyz qajet. Mundaı shara Qazaqstanda naqty jalǵasyn tabady»,-dedi Prezıdent.
Bul rette Memleket basshysy Bilim jáne ǵylym mınıstrligine sheteldik qandastarymyzǵa bólinetin oqytý kvotasyn naqtylaý týraly tapsyrma berdi. «Qazir bilektiń zamany emes, biliktiń zamany. Astanada álemdik deńgeıdegi halyqaralyq ýnıversıtet ashyldy. Bul oqý ornynda dúnıejúziniń eń bilikti oqytýshylary men ǵalymdary dáris oqıtyn bolady. Sondyqtan da álemniń ár qıyryndaǵy qazaq jastaryn atamekenge oqýǵa jáne qazaq eline qyzmet etýge shaqyramyn»,-dedi Elbasy.
Sondaı-aq Prezıdent shetelderde tehnıkalyq mamandyqpen bilim alyp jatqan qazaq jastaryn óz Otanyna tartý qajettigin de atap ótti. «Kerek bolsa, olarǵa áleýmettik qoldaý kórsetýdi de engizetin bolamyz»,-dedi N. Nazarbaev.
