Memleket basshysy «Aqparattyq Qazaqstan-2030» Memlekettik baǵdarlamasynyń jobasyn ázirleýdi tapsyrdy
ASTANA. 10 shilde. QazAqparat - QR Úkimeti 2012 jyldyń sońyna deıin «Aqparattyq Qazaqstan-2030» Memlekettik baǵdarlamasynyń jobasyn ázirlep, engizsin.
Bul jaıynda Elbasy Nursultan Nazarbaevtyń Qazaqstannyń áleýmettik jańǵyrtylýy jónindegi 18-shi tapsyrmasynda aıtylǵan.
«1. QR Úkimeti 2012 jyldyń sońyna deıin:
- «Aqparattyq Qazaqstan-2030» Memlekettik baǵdarlamasynyń jobasyn ázirlep, engizsin;
- «Memlekettik qyzmetterdi elektrondy pishinde kórsetý týraly» zań jobasyn ázirlesin;
- memlekettik qyzmetter usyný úlgilerin jáne olardyń oryndalýyna baqylaý jasaý júıesin qurýǵa kirissin;
- oblystardyń, Astana jáne Almaty qalalarynyń ákimderimen birlesip «elektrondy ákimdiktiń» oblys, qala, aýdan úlgisindegi úsh deńgeıli birúlgilik syzbasyn qurý jóninen usynystar engizsin.
2. QR Mádenıet jáne aqparat mınıstrligi:
- 2012-2013 jyldary Qazaq ulttyq elektrondy kitaphanasynyń qoryn ulǵaıtýdy qamtamasyz etsin;
- jýrnalısterdiń qoǵamdyq birlestikterimen birlesip Jýrnalıstik etıka kodeksiniń jobasyn ázirlesin;
- otandyq BAQ-tardy jańǵyrtý josparyn ázirlesin», - delingen Memleket basshysynyń 18-shi tapsyrmasynda.
