Memleket basshysy agrarlyq saladaǵy jańa zaýyttardy iske qosty

ASTANA. QazAqparat - Qazaqstanda aýyl sharýashylyǵy ónimderin shyǵaratyn úsh óndiris oshaǵy iske qosyldy. Atalǵan kásiporyndardyń jumysynyń bastalýyna búgin «Jańa ındýstrııalandyrý: qazaqstandyq barystyń  qadamy» ulttyq telekópiri barysynda  Memleket basshysy Nursultan Nazarbaev ruqsat berdi, dep habarlaıdy QazAqparat.

«Memlekettik qoldaýdyń arqasynda jańa otandyq sút zaýytyn iske qosamyz. Biz úshin aldyńǵy qatarly tehnologııa - bul shyǵyndardy qysqartý jáne básekege qabiletti ónim. Biz Eýrazııalyq odaq naryǵyndaǵy óz úlesimiz úshin kúresýge daıynbyz», - dedi «Maslodel» JShS dırektory Pavel Selıvanov.

Al «Shyǵys - Sút» JShS bas dırektory Seıiljan Saılaýbaev seriktestiktiń óndiris oshaǵy Qazaqstan Prezıdentiniń  ındýstrııalandyrý saıasatynyń jemisi ekendigin basa aıtty.

«Jobaǵa 4,6 mlrd teńge ınvestıtsııa quıyldy, 245 jańa jumys orny ashyldy. Biz quramynda 4 sút-taýarly ferma, 10 sút qabyldaý pýnkti, 18 fırmalyq saýda núktesi bar tik-ıntegratsııalanǵan sút klasterin qurdyq. Ónimniń 70-ke deıingi túrin shet memleketterge eksporttaýǵa daıynbyz», - dedi ol. 

Kelesi kezekte  «Jaıyq Agro LTD»  JShS dırektory Temirǵalı Eskendirov barlyq aýyl sharýashylyǵy mamandary atynan Elbasyǵa alǵysyn bildirdi.

«Elimizdiń batys, shyǵys jáne soltústigindegi 3 jańa taǵam óndirisi - bıznes pen aýyl sharýashylyǵy kesheniniń damýyna baǵyttalǵan memlekettik baǵdarlamalardyń nátıjesi. Agrarlyq sala ekonomıkanyń qozǵaýshy kúshine aınalýy úshin barymyzdy salamyz.  Eksportqa baǵyttalǵan kásiporyndardy iske qosýǵa ruqsat etińiz?!», - dedi Eskendirov.

Úsh óndiris ornynyń jumystaryna sáttilik tilep, óndiristi bastaýǵa ruqsat bergen QR Prezıdenti: «Agrarlyq sala Qazaqstannyń órkendeý, ósý jolyndaǵy ekonomıkasynyń  negizine aınalyp keledi. Sebebi, dúnıejúzinde tańerteń, túste, keshke tamaq ishpeıtin adam joq. Halyq kóbeıýde. Jyldan-jylǵa suranys ta artyp kele jatyr. Sondyqtan, biz ónimder shyǵaratyn óndiristerdi jolǵa qoımaı eshqaıda shyǵa almaımyz», - dep atap ótti.