Memleket basshysy AEF qatysýshylaryna bilim berýdegi jańa trendterdi atady
Elbasy jahandyq eńbek naryǵynyń ózgerýin álemdik ózgeristerge yqpal etken bes negizgi úrdistiń biri dep atady.
«Jaqyn arada ádettegi eńbek kúshiniń 80 protsenti robottandyrylǵan júıemen almastyrylady. Qazirgi kásiporyndar úshin jumys kúshiniń arzandyǵy emes, bilikti qyzmetkerlerdiń bolýy mańyzdyraq. Damýshy elderdegi óndiris oryndary da damyǵan elderge keri qaıtarylyp jatyr. Munyń barlyǵy ulttyq ekonomıkalar men áleýmettik júıeler úshin úlken syn-qater», - dedi Nursultan Nazarbaev.
Onyń aıtýynsha, atalǵan máseleniń negizgi sheshimi - bilim berý júıesin reformalaý.
«Bilim berý praktıkasynan kreatıvti oılaý, qajetti aqparatty taýyp, ony utymdy paıdalana bilý qabiletterin úıretýge kóshý qajet. Tehnıkalyq progrestiń jyldamdyǵy qazirgi adamnan birneshe mamandyqty meńgerýdi jáne ómir boıy bilim alýdy talap etedi. Qazaqstan bul baǵytta sáıkes jumystardy júrgizýde, biz buǵan daıyndaldyq jáne áli de daıyndyq ústindemiz», - dep tolyqtyrdy sózin Prezıdent.
Osy oraıda Elbasy Keńes Odaǵy ydyrap, halyq úshin kúrdeli kezeńde qazaq jastary álemniń úzdik oqý oryndarynda bilim alýy úshin «Bolashaq» baǵdarlamasy ashylǵanyn atap ótti. 25 jylda 13 myń qazaqstandyq memleket esebinen úzdik JOO-larda bilim aldy. Qazirgi ýaqytta 70 myń stıpendıat shetelde oqyp jatyr.
«Sonymen qatar álemdik joǵary deńgeıdegi óz ýnıversıtetterimizdi de ashtyq, olar: Nazarbaev ýnıversıteti, QBTÝ, Qazaqstan menedjment, ekonomıka jáne josparlaý ınstıtýty, Halyqaralyq aqparattyq júıeler ýnıversıteti. Olar da biliktigi joǵary mamandar ázirleýde. Memleket grant sanyn kóbeıtip jatyr, stýdentterdiń ómir súrý deńgeıin jaqsartýǵa kúsh salýda. Ótken jyly jastarǵa arnalǵan tegin kásibı-tehnıkalyq bilim berý baǵdarlamasyn iske qostyq. Jastar alǵashqy mamandyǵyn alyp, jumysqa ornalasady, ári qaraı óz ómirin josparlaıdy», - dedi Elbasy.
Nazarbaev álemdik deńgeıdegi stýdentterdi ázirleý úshin Qazaqstan mektepterine de reforma jasalyp jatqanyn atap ótti. Qazaqstanda ázirge halyqaralyq akkredıtatsııadan ótken 20 Zııatkerlik mektep bar jáne qalǵan mektepterdi de sol deńgeıge jetkizý úshin jumystar júrgiziledi.
Aıta keteıik, XI Astana ekonomıkalyq forýmy elordada 17-19 mamyr kúnderi ótedi. Buǵan deıingi forýmdarda jahandyq ekonomıka, tsıfrlandyrý jáne taǵy basqa máseleler qaralsa, bıylǵy forým kezinde resýrstar, robotızatsııa, adamzattyń ózgerýi, agroónerkásip salasyndaǵy jetistikter, densaýlyq salasynyń máseleleri talqylanady.
