Memleket basshysy adam saýdasy týraly: Jaǵdaı kúrdeli dep aıtýǵa bolady

NUR-SULTAN. QazAqparat – Memleket basshysy Qasym-Jomart Toqaev adam saýdasyna qatysty máselege jeke toqtalyp, bul baǵytta tirkeletin qylmystardy anyqtaý úshin naqty sharalardy qabyldaýdy tapsyrdy, dep habarlaıdy QazAqparat tilshisi.

«Adam quqyǵyn qorǵaý – kún tártibinde . Bul másele boıynsha turaqty túrde jumys júrgizýimiz kerek. Bul adam saýdasymen kúreske de qatysty. Bul rette sheshilmeı jatqan másele kóp. Tipti jaǵdaı kúrdeli dep te aıtýǵa bolady. Adam saýdasy týraly halyqaralyq reıtıngter men baıandamalarda Qazaqstannyń jaǵdaıy onsha emes. Men bul máselege Joldaýda jeke toqtaldym. Endigi kezekte barlyq ýákiletti organdardyń batyl ári úılesimdi áreketi kerek. Qazaqstannyń zańnamasyn halyqaralyq standarttarǵa saı beıimdegen abzal», - dedi Prezıdent Ulttyq qoǵamdyq senim keńesiniń otyrysynda.

Memleket basshysynyń aıtýynsha, adam saýdasyna qatysty qylmystardyń aldyn alý jáne olardy anyqtaý boıynsha naqty sharalardy qabyldaý kerek.

«Adam saýdasy men májbúrli eńbektiń zardabyn shekken shetel azamattarynyń bárine kómek kórsetilýi tıis. Myńdaǵan adamnyń taǵdyry men Qazaqstannyń abyroıy qabyldanǵan sharalardyń tıimdiligine baılanysty», - dedi Prezıdent.