Memleket basshysy A.V.Seleznev atyndaǵy horeografııalyq ýchılışeni mereıtoıymen quttyqtady
ALMATY. QazAqparat - Almatyda A.V.Seleznev atyndaǵy horeografııalyq ýchılışeniń 80 jyldyǵyna arnalǵan merekelik kontsert ótti.
Sharaǵa qala ákimi Ahmetjan Esimov, mádenıet qaıratkerleri, qoǵam jáne shyǵarmashylyq zııaly qaýym ókilderi qatysty, dep habarlaıdy Almaty qalasy ákimdiginiń baspasóz qyzmetinen.
Qala basshysy QR Prezıdenti Nursultan Nazarbaevtyń oqý ornynyń mereıtoıyna baılanysty joldaǵan quttyqtaýyn oqydy. «Qazaqstandyq balet mektebiniń tarıhy asa baı. El sizderdiń barlyq tárbılenýshilerińizdi maqtan tutady. Olardyń kópshiligi bedeldi halyqaralyq balet konkýrstarynyń laýreattary men dıplomattary atandy. Sizderdiń tárbılenýshilerińizdiń jetistikteri - bul bedeldi horeografııalyq sheberlik mektebiniń barlyq kezeńdegi pedagogıkalyq ujymynyń eren eńbeginiń arqasy», - delingen Memleket basshysynyń quttyqtaý sózinde. Oqý ornynyń ónerpazdary óz sheberlikterin sahna tórinde pash etti. Kontserttik baǵdarlamada álem halyqtarynyń bıleri, qazaqstandyq jáne sheteldik kompozıtorlardyń mýzykalary boıynsha zamanaýı horeografııa men klassıkalyq baletten qoıylymdar qoıyldy. A.V.Seleznev atyndaǵy Almaty horeografııalyq ýchılışesi - Táýelsiz Qazaqstandaǵy burynnan kele jatqan oqý oryndarynyń biri. Kásibı balet mektebiniń jumysy Abaı atyndaǵy memlekettik opera jáne balet teatrynyń qyzmetimen tyǵyz baılanysty. Sondaı-aq bul ýchılışeniń el óneri men mádenıetin damytyp, jetildirýdegi mańyzy zor.
