Memleket basshysy Á.Smaıylovqa QR Statıstıka agenttiginiń jumysyna Halyqaralyq standarttardy engizýdi tapsyrdy
ASTANA. 15 qarasha. QazAqparat - Memleket basshysy Nursultan Nazarbaev Qazaqstan Respýblıkasy Statıstıka agenttiginiń tóraǵasy Álıhan Smaıylovty qabyldady.
Bul týraly QR Prezıdentiniń baspasóz qyzmeti habarlady.
Kezdesý barysynda Á.Smaıylov Agenttik qyzmetiniń nátıjeleri men statıstıkalyq ádistemeni jetildirý, aqparattyq júıeni ázirleý men damytý jáne statıstıkalyq málimetterdi paıdalanýdy qamtamasyz etýdi jaqsartý jónindegi aldaǵy jumystardyń keleshegi týraly baıandady.
Sonymen qatar, Agenttik tóraǵasy statıstıkalyq aqpartty jınaý men óńdeýde avtomattandyrý úderisine baǵyttalǵan «e-Statıstıka» ıntegratsııalanǵan aqparattyq júıeniń qaǵıdattary men BUU-nyń usynymdaryna negizdelgen resmı statıstıkanyń normalary men standarttary bekitilgen «Memlekettik statıstıka týraly» jańa Zańnyń qabyldanýy týraly habardar etti.
- Búginde statıstıkalyq málimetterge sáıkes, qazaqstandyqtardyń ortasha ómir súrý uzaqtyǵy 70 jylǵa jaqyndady, sondaı-aq 69,6 jasqa jetti, sonyń ishinde áıelderdiń ómir súrý uzaqtyǵy 74 jyldan asty. Osynyń bári - elimiz azamattarynyń ómir súrý sapasyn arttyrý jónindegi tıimdi memlekettik saıasattyń nátıjesi jáne densaýlyq saqtaý salasynyń qarqyndy damýynyń kórsetkishi, - dep atap ótti Nursultan Nazarbaev.
Qazaqstan Prezıdenti halyqaralyq ádister men praktıkaǵa sáıkes qajetti, der kezindegi jáne senimdi málimetterdi paıdalanýdy qamtamasyz etý maqsatynda elimizdiń ulttyq statıstıkalyq júıesiniń tıimdiligi men nátıjeliligin arttyrýǵa nazar aýdardy.
Memleket basshysy kezdesýdiń qorytyndysy boıynsha Agenttiktiń aqparattyq júıesin ózge memlekettik organdardyń júıesimen ıntegratsııalaý jóninde, sondaı-aq statıstıkalyq qyzmetke halyqaralyq standarttardy engizý týraly naqty tapsyrmalar berdi.
