Memleket basshylary Qazaqstannyń ShYU-ǵa tóraǵalyǵyna joǵary baǵa berdi

ASTANA. QazAqparat - Memleket basshylary Qazaqstannyń Shanhaı yntymaqtastyq uıymyna tóraǵalyǵyna eń joǵary baǵa berdi. Bul týraly búgin  ShYU-ǵa múshe memleketter basshylary keńesiniń keńeıtilgen otyrysynan keıingi brıfıngte ShYU Bas hatshysy Rashıd Alımov málim etti, dep habarlaıdy QazAqparat.

«Memleket basshylary ShYU-ǵa Qazaqstan Respýblıkasynyń tóraǵalyǵyna joǵary baǵa berdi jáne Astanadaǵy is-shara barysynda kórsetilgen qonaqjaılylyǵy úshin qazaqstandyq tarapqa rızashylyq bildirdi. Qazaqstan Respýblıkasynyń ShYU-ǵa Tóraǵalyǵy laıyqty túrde eń joǵary baǵasyn aldy. Sammıtke barar jolda Qazaqstan Prezıdentiniń jeke óz tarapynan jáne QR Úkimeti tarapynan únemi barynsha joǵary qyzyǵýshylyq bilinip turdy. Qazaqstandyq tóraǵalyqtyń 345 kúninde barynsha túrli deńgeıde ártúrli baǵytta 300-den astam shara ótkendigin atap ótsek te jetkilikti. Bul is-sharalardyń shyrqaý shegi ShYU-nyń Astana sammıti bolǵany sózsiz. Shyn máninde bul uıym qyzmetiniń barlyq salalaryndaǵy iskerlik belsendiliktiń jarqyn kezeńi edi», - dedi Alımov.

Onyń aıtýynsha, Qazaqstannyń tóraǵalyǵy kezinde Azııa, Eýropa men Amerıka alańdaryndaǵy 100-den astam túrli halyqaralyq forýmdarda, konferentsııalarda ShYU qyzmeti jan-jaqty kórsetildi. Munan bólek, ShYU-nyń BUU-men ózara is-qımyly jańa sapaly deńgeıge kóterildi.

«Nıý-Iorktegi BUU-nyń shtab-páterinde, BUU-nyń Vena bólimshesinde tarıhta alǵash ret ShYU men BUU arasyndaǵy eń joǵary deńgeıdegi birlesken is-shara ótkizildi», - dedi ShYU Bas hatshysy.