Prezıdenttiń Olımpıada júldegerlerimen kezdesýi shegerildi – sportshylardan COVID anyqtaldy

ASTANA. KAZINFORM — 15 tamyzda QR Prezıdenti Qasym-Jomart Toqaev Parıj Olımpıadasynyń jeńimpazdary jáne júldegerlerimen kezdesedi dep josparlanǵan bolatyn. Biraq bul is-shara keıinge shegerildi. Bul týraly QR Prezıdentiniń keńesshisi – Prezıdenttiń Baspasóz hatshysy Berik Ýálı aıtty. 

Zakon.kz-tiń jazýynsha, B. Ýálı Prezıdenttiń Parıj Olımpıadasynyń jeńimpazdary jáne júldegerlerimen kezdesýi ne sebepti keıinge shegerilgenin túsindirdi.

«Ózderińizge belgili, Prezıdent keshe Parıj Olımpıadasynyń júldegerleri men bapkerler quramyn memlekettik nagradalarmen marapattaý týraly Jarlyqqa qol qoıdy. Qasym-Jomart Kemeluly Ulttyq qurama múshelerimen búgin kezdesýdi josparlaǵan bolatyn. Ókinishke qaraı, atletter men jattyqtyrýshylardyń jartysynan koronavırýs ınfektsııasy anyqtaldy. Sol sebepti kezdesý keıinge shegerildi. Sportshylar men bapkerlerdiń tezirek saýyǵyp ketýine tilektespiz», - dedi QR Prezıdentiniń keńesshisi – Prezıdenttiń Baspasóz hatshysy.

Onyń aıtýynsha, Memleket basshysy Olımpıada júldegerlerin mindetti túrde qabyldaıdy. Kezdesý tamyz aıynyń sońynda Aqordada ótedi dep josparlanyp otyr.

Aıta keteıik, 14 tamyzda Memleket basshysy Qasym-Jomart Toqaev Parıjde ótken XXXIII jazǵy Olımpıada oıyndaryndaǵy joǵary sporttyq jetistikteri úshin Qazaqstan ulttyq quramasynyń bir top sportshysy men bapkerin memlekettik nagradalarmen marapattaý týraly Jarlyqqa qol qoıdy.