Memleket basshysynyń IV Ulttyq quryltaıda kótergen máseleleri qalaı júzege asyrylyp jatyr
ULYTAÝ. KAZINFORM - Búgin QR Prezıdentiniń keńesshisi Málik Otarbaevtyń qatysýymen ótken aktıv otyrysynda IV Ulttyq quryltaıda bergen tapsyrmalardy oryndaý jáne aımaqtyń áleýmettik-ekonomıkalyq damý máseleleri talqylandy.
Jıynǵa Ulytaý oblysynyń ákimi Dastan Ryspekov, oblystyq máslıhattyń tóraǵasy Baýyrjan Shyńǵysov, ákimniń orynbasarlary jáne máslıhat depýtattary qatysty.
Prezıdent keńesshisi Málik Otarbaev:
- Ulytaý oblysyna kelýdegi maqsatym — Ulttyq quryltaıda Memleket basshysynyń baǵdarlamalyq baıandamasy týraly ózderińizben pikir almasý. El Prezıdentiniń baǵdarlamalyq baıandamasy — memlekettik mańyzy bar qujat. Quryltaıda óte ózekti máselelerdiń kóterilgenin jaqsy bilesizder. Sol máselelerdiń túbegeıli sheshilýinde Prezıdent tıisti tapsyrmalar beredi. Bıyl Býrabaıda ótken quryltaıda 53 másele kóterilip, 53 tarmaqtan turatyn memlekettik mańyzy bar qujat qabyldandy. El Prezıdenti quryltaıda kótergen eń basty másele — zań men tártip. Zań men tártipke baǵyný mádenıetin qalyptastyrý — memlekettiń aldynda turǵan eń úlken mindet, — dedi.
Oblys ákiminiń orynbasary Jánibek Nópirov óńirdiń áleýmettik-ekonomıkalyq jaǵdaıy týraly málimdedi.
- Ulytaý oblysy boıynsha jalpy óńirlik ónim ósimi - 7,7%-dy, jan basyna shaqqanda - 10,8 mln teńgeni quraıdy. Bul eldegi eń joǵary kórsetkishterdiń biri. Sonymen qatar, 2024 jyly oblys boıynsha jalpy somasy 34 mlrd teńgeni quraıtyn 9 ınvestıtsııalyq joba iske qosylsa, bıyl 138 mlrd teńge somasyna 17 ınvestıtsııalyq jobany iske asyrý josparlanǵan, - dedi Jánibek Nópirov.
Málik Nurjanuly sonymen qatar oblys ortalyǵyndaǵy sport nysandaryn aralap, quqyq qorǵaý organdarynyń ókilderi, etnomádenı birlestikter jetekshileri, áleýmettik sala qyzmetkerleri, oblystyń ımamdarymen kezdesti.
Kezdesýde qoǵamdaǵy ózekti máseleler týraly pikir almasty.