Memleket basshysynyń bastamasyna aımaqtar erekshe qoldaýlaryn bildirýde
QYZYLODA. KAZINFORM - Syr boıyndaǵy Jalaǵash aýdanynyń Tań aýyly turǵyndary el Prezıdentiniń bastamasymen bastaý alǵan ekologııalyq aktsııasyna aıryqsha yqylastaryn bildirýde.
Bastamaǵa oraı eldi mekenderdi abattandyrý men kógaldandyrýǵa shaqyrǵan oblys ákiminiń úndeýine sáıkes Tań aýylynda «Taza Qazaqstan - taza aımaq» aktsııasy ótti.
Aımaqtaǵy úlgili eldi mekenderdiń biri sanalatyn aýyl turǵyndary tazalyqty óz aýlalarynan bastaýdy ádetke aınaldyrǵan. Aýylǵa kireberisten-aq birkelki jasyl-jelektiń jaıqalýynda, abattandyrý jumystarynyń eldi mekenge kórik berýinde aýyl turǵyndarynyń eńbegi zor. Birlik pen yntymaqty tý etken jergilikti halyq óz aýlalarynan bastap, kóshelerine deıin tazalyq jumystaryn júrgizip, belsene atsalysyp keledi.
Búgingi Tań eldi mekeninde uıymdastyrylǵan aktsııaǵa Qazaqstannyń Eńbek Eri Imamzada Shaǵyrtaev bastaǵan 200-ge jýyq aýyl turǵyndary, ardagerleri, belsendi jastary, eriktileri qatysty. Aýyldaǵy «Tań LTD» seriktestigi aýyldy abattandyrý jumystaryna óz úlesterin qosyp keledi. Aǵashtar kóshettelip, alleıalar, kósheler, mekeme aýlalary tazartyldy. Aıaq sý keletin aryqtar men kanaldardy arshý, qoqystardan tazartý jumystary qolǵa alyndy.
Jalaǵash aýdanynda kórkeıtý jáne kógaldandyrý baǵytynda jyl basynan beri 7500-ge jýyq aǵash otyrǵyzyldy.
