Memleket basshysynyń atynan World Tennis prezıdenti Devıd Haggertıge «Dostyq» ordeni tabystaldy
ALMATY. KAZINFORM - Almatyda ótip jatqan World Tennis Bas assambleıasy aıasynda uıym prezıdenti Devıd Haggertı II dárejeli «Dostyq» ordenimen marapattaldy.
Memlekettik nagradany Qazaqstan Prezıdenti Qasym-Jomart Toqaevtyń atynan Týrızm jáne sport mınıstri Erbol Myrzabosynov tabystady, dep habarlaıdy mınnıstrliktiń baspasóz qyzmeti.
Marapat Devıd Haggertıge halyqaralyq sporttyq yntymaqtastyqty damytýǵa, elder arasyndaǵy dostyq baılanystardy nyǵaıtýǵa jáne álemdik tennıstiń órkendeýine qosqan kópjyldyq úlesi úshin berildi.
Saltanatty rásimde Almaty qalasynyń ákimi Darhan Satybaldy Memleket basshysynyń Bas assambleıa qatysýshylaryna joldaǵan quttyqtaýyn oqyp berdi.
-Osy bedeldi halyqaralyq forýmnyń Almatyda ótýi álemdik qaýymdastyqtyń elimizge degen zor senimi men qurmetin kórsetedi. Biz úshin mundaı moıyndaý – úlken mártebe. Búgingi jyl saıynǵy Bas assambleıa seriktestigimizdi odan ári nyǵaıtýǵa jáne osy sport túrin búkil álemde damytýǵa yqpal etetinine senimdimin, – delingen Prezıdenttiń úndeýinde.
Devıd Haggertı 2015 jyldan beri halyqaralyq tennıs uıymyn basqaryp keledi. Buǵan deıin AQSh tennıs qaýymdastyǵynyń (USTA) prezıdenti qyzmetin atqarǵan. 2020 jyldan bastap Halyqaralyq Olımpıada komıtetiniń múshesi.
Marapattaý rásiminde Qazaqstan tennıs federatsııasynyń prezıdenti, World Tennis vıtse-prezıdenti Bolat Ótemuratov Devıd Haggertıge qazaq halqynyń qurmeti men qonaqjaılyǵynyń belgisi retinde shapan japty.
Aıta keteıik, 10-13 qazan kúnderi Almatyda ótip jatqan World Tennis Bas assambleıasyna 137 elden 262-den astam delegat qatysýda. Jıynda álemdik tennısti damytý, balalar men jasóspirimder sportyn qoldaý, ınfraqurylymdy jetildirý, halyqaralyq jarystardy uıymdastyrý jáne ulttyq federatsııalar arasyndaǵy yntymaqtastyqty nyǵaıtý máseleleri talqylanýda.
Aýqymdy halyqaralyq forýmnyń Qazaqstanda ótýi elimizdiń álemdik sport qaýymdastyǵyndaǵy bedelin arttyryp, halyqaralyq seriktestikti keńeıtýge jańa múmkindikter ashady.
