Memleket basshysynyń atynan Ulttyq quryltaı qatysýshylaryna aýyzashar berildi
ASTANA. KAZINFORM - Prezıdent jınalǵan qaýymdy qasıetti Ramazan aıymen quttyqtap, olarǵa Ulttyq quryltaı jumysyna belsendi atsalysqany úshin rızashylyǵyn bildirdi.
Sonymen qatar Memleket basshysy Orazaǵa tuspa-tus kelgen bıylǵy jıynnyń mán-mańyzy erekshe ekenin atap ótti, dep habarlaıdy Aqordanyń baspasóz qyzmeti.
– Barsha musylman qaýymy Ramazan aıyn asyǵa kútedi, osy qasıetti aıda eń asyl tilekterin tilep, duǵalaryn jasaıdy. Jurtshylyq ımanyn kúsheıtip, rýhanı tazarady. Azamattarymyz muqtaj jandarǵa kómektesedi, basqa da ıgi amaldar jasaıdy. Mundaı qadamdar, túptep kelgende, ár adamǵa, ár shańyraqqa bereke ákeledi. Sol arqyly elimizdiń yntymaǵy arta túsedi, – dedi Prezıdent.
Qasym-Jomart Toqaev Islam dinin tól mádenıetimizdiń ajyramas bóligi ekenin aıtyp, ata dinimizdiń adamzatty meıirimdi, adal, bilimpaz jáne eńbekqor bolýǵa úndeıtinin jetkizdi.
– Osy asyl qasıetter halqymyzdyń salt-dástúrinen de aıqyn kórinedi. Ózderińizge málim, men ulttyń jańa sapasyn qalyptastyrý týraly únemi aıtyp júrmin. Quryltaı kezinde de aıttym. Elimizdiń árbir turǵyny naǵyz «Adal azamat» bolýy kerek. Biz jas urpaqtyń boıyna udaıy jaqsy qasıetterdi sińire berýimiz qajet, – dedi Qasym-Jomart Toqaev.
Memleket basshysynyń aıtýynsha, ozyq el bolý úshin azamattarymyzdyń minez-qulqy, is-áreketi, oıy, nıeti – bári de soǵan saı bolýy kerek. Bul oraıda jastarǵa adal eńbekpen tabysqa jetý qajettigin túsindirý, el aǵalarynyń ómirlik tájirıbesin úıretý óte mańyzdy.
Prezıdent búgingi Ulttyq quryltaı jıynynda din men dástúrdiń birligine arnaıy toqtalǵanyn atap ótip, ulttyq bolmysymyzdyń arqaýy sanalatyn osy eki qundylyqty bir-birine qarsy qoıyp júrgen teris aǵymdar jóninde alańdaýshylyǵyn bildirdi
– Ashyǵyn aıtsaq, din máselesi bul – ulttyq qaýipsizdik máselesi. Biz syrttan kelgen jat aǵymdardyń urpaq sanasyn ýlaýyna jol bermeýimiz kerek. Buǵan salt-dástúrimizdi saqtaý jáne sanaly urpaq tárbıeleý arqyly tótep bere alamyz. Osy oraıda Qazaqstan musylmandary dinı basqarmasy aıryqsha ról atqarýǵa tıis. Iman jolyna bet burǵan jastarǵa durys baǵyt silteý – óte mańyzdy mindet. Múftııat osy iske basa mán berip, muqııat aınalysqany jón, – dedi Qasym-Jomart Toqaev.
Memleket basshysy elimizdiń jańashyldyq pen jasampazdyq jolyna túskenine nazar aýdardy. Bul – Naýryz merekesimen jáne Islam qundylyqtarymen tolyq úndesetin sara jol.
– Bıyldan bastap elimizde áz-Naýryzdyń onkúndigin jarııaladyq, ıaǵnı ár kúndi erekshe atap ótetin boldyq. Búgin 15 naýryz – «Qaıyrymdylyqqa» arnalǵan. Ulystyń uly kúni qarsańynda elimizde kóptegen ıgi ister jasalýda. Halqymyz janashyrlyq, tileýlestik, baýyrmaldyq sııaqty asyl qasıetterin is júzinde kórsetip jatyr. Bul, shyn máninde, ozyq qoǵamǵa tán sıpat deýge bolady, – dedi Memleket basshysy.
Aýyzasharda Qazaqstannyń Eńbek Eri, kompozıtor Ilıa Jaqanov, «Vaınah» Qazaqstan sheshenderi men ıngýshtary qaýymdastyǵynyń teń tóraǵasy Ahmet Mýradov, Astana memlekettik qyzmet habynyń Basqarýshy komıtetiniń tóraǵasy Álıhan Baımenov sóz sóıledi.
