Memleket basshysynyń atynan Erlan Qoshanov birqatar azamatqa memlekettik nagradalardy tabystady
ASTANA. KAZINFORM – Qazaqstan Halyq Keńesiniń Tóraǵasy Erlan Qoshanov Respýblıka kúni qarsańynda Memleket basshysy Qasym-Jomart Kemeluly Toqaevtyń atynan birqatar qazaqstandyqqa memlekettik nagrada tapsyrdy. Osy kúni Halyq Keńesi janynan qurylǵan «Birlik» qoǵamdyq tobynyń alǵashqy otyrysy da ótti. Bul alań konstıtýtsııalyq organnyń quramyna enbegen, elimizdiń barlyq óńirindegi etnomádenı birlestikterdiń ókilderin biriktirdi.
Qatysýshylar aldynda sóz sóılegen Erlan Qoshanov Respýblıka kúniniń tarıhı mańyzyn atap ótip, 25 qazannyń egemen Qazaqstannyń qalyptasýyndaǵy rólin eske saldy.
– Memleket basshysy Qasym-Jomart Kemeluly Toqaevtyń bastamasymen Respýblıka kúni ulttyq mereke mártebesin qaıta aldy. Bul sheshim elimizdiń damýyndaǵy jańa kezeńmen sabaqtasty. Egemendigimizdiń bastaýyna jańasha qarap, onyń qadirin tereńirek túsinýge jol ashty, – dedi Erlan Qoshanov.
Qazaqstan Halyq Keńesiniń Tóraǵasy Táýelsizdik jyldaryndaǵy elimizdiń jetistikterine toqtalyp, Qazaqstannyń halyqaralyq bedeliniń nyǵaıǵanyn jáne áleýmettik-ekonomıkalyq ózgeristerdiń nátıjelerin atap ótti. Onyń aıtýynsha, búginde Qazaqstan jahandyq máselelerdi sheshýge belsendi qatysatyn orta derjava retinde tanyldy.
Sońǵy jeti jylda elimizdiń ekonomıkasyna 155 mlrd dollar sheteldik ınvestıtsııa tartyldy. Jan basyna shaqqandaǵy JІÓ 15 myń dollarǵa jetti. Osy kezeńde 118 mln sharshy metr turǵyn úı paıdalanýǵa berilip, 36,3 myń shaqyrym avtomobıl joly salynyp, jóndeýden ótti. 1300-den astam mektep, 1483 balabaqsha jáne 1259 medıtsınalyq mekeme ashyldy. 2024 jyly Moody’s halyqaralyq reıtıngtik agenttigi Qazaqstanǵa óz tarıhyndaǵy eń joǵary kredıttik reıtıngti «Turaqty» boljamymen berdi. Bul reıtıng bıyl da rastaldy.
Memlekettiń damýyndaǵy qundylyqtyq negizder týraly aıta kele, Erlan Qoshanov qoǵamdyq kelisimdi nyǵaıtýda mańyzdy baǵdar bolyp sanalatyn Memleket basshysynyń «Birligimiz – áralýandyqta» qaǵıdatyna nazar aýdardy.
– Birlik degenimiz – ártúrli bola otyryp, bir-birimizdiń tarıhymyzdy qurmetteý jáne elimizdiń bolashaǵy úshin ortaq jaýapkershilikti seziný. Bul birlikti odan ári nyǵaıtyp, elimizdiń yntymaǵyn arttyrý úshin ortaq adamgershilik qundylyqtarǵa súıený mańyzdy, – dedi Erlan Qoshanov.
Halyq Keńesiniń Tóraǵasynyń aıtýynsha, bul qundylyqtar Memleket basshysynyń zańǵa qurmet, ádildik jáne el bolashaǵy úshin jaýapkershilik qaǵıdattaryna negizdelgen «Zań jáne tártip», «Adal azamat» jáne «Taza Qazaqstan» bastamalarymen úndesedi.
Odan ári Erlan Qoshanov etnomádenı birlestikterdiń qoǵamdyq senimdi nyǵaıtýǵa, etnosaralyq kelisimdi saqtaýǵa jáne Prezıdent bastamalaryn ilgeriletýge qosyp otyrǵan úlesine nazar aýdardy. Onyń aıtýynsha, Halyq Keńesi janynan qurylǵan «Birlik» toby ózara is-qımyldy keńeıtip, birlestikter ókilderin jalpyulttyq máselelerdi talqylaý úderisine belsendirek tartýǵa múmkindik beredi.
– Sizder Halyq Keńesiniń qurylýymen etnosaralyq kelisim máselelerine ǵana emes, jalpyulttyq mindetterdi sheshýge de belsendi qatysýǵa múmkindik alasyzdar.Bastamalar kóterip, halyqty tolǵandyratyn máselelerdi ortaǵa salyp, búkil el úshin mańyzdy sheshimderdi talqylaýǵa qatysasyzdar.Biz «Birlik» tobyn dál osy maqsatta quryp otyrmyz, – dedi Erlan Qoshanov.
Toptyń úsh negizgi baǵyt boıynsha júrgiziledi. Birinshisi – etnomádenı birlestikterdiń halyqpen jumys isteý tájirıbesine súıene otyryp, qoǵamdyq mańyzy bar máselelerdi sheshýge qatysýy. Ekinshisi – jastar bastamalaryn qoldaý jáne jas urpaqty qoǵamdyq ómirge belsendi tartý. Úshinshisi – áleýmettik jeliler men aqparattyq jobalar arqyly birlik pen kelisim ıdeıalaryn ilgeriletý.
Jıynda Erlan Qoshanov ulyq mereke qarsańynda elge eńbegi sińgen azamattarǵa qurmet kórsetý jaqsy dástúr ekenin, bunyń Respýblıka kúni qarsańynda erekshe mańyzǵa ıe ekenin atap ótti.
– Búgin Memleket basshysy Qasym-Jomart Kemeluly Toqaev birqatar otandastarymyzǵa joǵary memlekettik nagradalar tabys etti. Marapattalǵandardyń arasynda bizdiń áriptesterimiz de bar. Birqatary marapatyn Prezıdenttiń qolynan aldy. Barshańyzdy osy qýanyshpen shyn júrekten quttyqtaımyn! Bul – el ıgiligi jolyndaǵy adal eńbekterińizge berilgen joǵary baǵa, – dedi.
Prezıdenttiń atynan Erlan Qoshanov belsendi azamattyq ustanymy jáne qoǵamdyq-saıası saladaǵy jemisti eńbegi úshin azamattarǵa memlekettik nagradalar tabystady.
Prezıdent atynan mádenıet jáne aqparat salasynyń ókilderine memlekettik nagradalar tabystalǵanyn jazǵan bolatynbyz.
