Memleket basshysynyń atynan Astanada bir top BAQ qyzmetkerine páter berildi
ASTANA. KAZINFORM — Jýrnalısterdiń kásibı merekesi qarsańynda Prezıdent Qasym-Jomart Toqaevtyń atynan buqaralyq aqparat quraldarynyń bir top qyzmetkerine baspana berildi.
«Dara» Prezıdenttik bastamalar qorynyń uıymdastyrýymen ótken is-sharada Prezıdent keńesshisi — Baspasóz hatshysy Aıbek Smadııarov medıa mamandaryn merekemen quttyqtap, Memleket basshysynyń tapsyrmasymen BAQ qyzmetkerlerine páter berý bastamasy bıyl tórtinshi jyl qatarynan júzege asyrylyp jatqanyn atap ótti.
— Bul ıgi jobanyń bıylǵy ereksheligi — páterler Astanada ǵana emes, Almatyda, sonymen qatar elimizdiń barlyq oblysynda da beriletin boldy. Mundaǵy maqsat — óńirlik jýrnalıstıkany damytý jáne áriptesterdi áleýmettik turǵyda qoldaý. Mereke qarsańynda oblystyq aqparat quraldarynyń qyzmetkerleri, sondaı-aq respýblıkalyq BAQ-tardyń jergilikti tilshileri qonys toıyn toılaǵaly jatyr. Tipti ortalyqtan shalǵaı eldi mekender de nazardan tys qalǵan joq. Mysaly, bul joly Qostanaı oblysynyń Arqalyq qalasynda jáne Túrkistan oblysynyń Sozaq aýdanynda turatyn áriptesterimiz úıli bolmaq, — dedi Aıbek Smadııarov.
Bıyl BAQ qyzmetkerlerine 66 páter beriledi. Onyń ishinde Astana qalasynda — 15, Almaty qalasynda — 15, qalǵan 18 aımaqta 2 páterden bólindi.
Baspanaǵa úmitkerlerdi anyqtaý, páterlerdi daıarlaý jumystaryn «Dara» Prezıdenttik bastamalardy qoldaý qory, Prezıdenttiń Іs basqarmasy, jergilikti atqarýshy organdar men BAQ redaktsııalary birlese júrgizdi.
Atap óterlik jaıt, ótken úsh jylda Prezıdent atynan BAQ salasynyń 200 qyzmetkerine baspana berildi.
