Memleket basshysynyń atyna Respýblıka kúnine oraı quttyqtaýlar kelip jatyr
Qasym-Jomart Toqaevtyń atyna Respýblıka kúnine oraı shet memleketter men halyqaralyq uıymdar basshylarynan quttyqtaý jedelhattary tolassyz túsip jatyr, dep habarlaıdy Kazinform Aqordanyń resmı saıtyna silteme jasap.
GFR Federaldyq Prezıdenti Frank-Valter Shtaınmaıer quttyqtaý jetelhatynda Qazaqstan men Germanııanyń ózara senim men seriktestikke negizdelgen qarym-qatynasy sońǵy 30 jyl ishinde tańqalarlyq deńgeıge kóterilgenin atap ótti.
«Elderimiz arasyndaǵy tyǵyz baılanystar joǵary deńgeıdegi saıası kezdesýlerde ǵana emes, sondaı-aq ártúrli saladaǵy tabysty yntymaqtastyqtan da kórinedi. Germanııa bolashaqta da Qazaqstannyń senimdi seriktesi bolyp qala beredi jáne Sizdiń bastamańyzben júrgizilip jatqan reformalardyń jalǵasýyna qoldaý kórsetedi», – delingen jedelhatta.
BAÁ Prezıdenti Muhammed ben Zaıd Ál Nahaıan Qasym-Jomart Toqaevty Ulttyq merekemen quttyqtap, dostas Qazaqstan halqynyń ósip-órkendeı berýine tilektestik bildirdi.
Mysyr Prezıdenti Ábdel Fattah as-Sısı óz jedelhatynda eki el halyqtarynyń jarqyn bolashaǵy jolyndaǵy kópjaqty yntymaqtastyqty odan ári nyǵaıtý úshin Mysyr men Qazaqstan mol áleýetke ıe ekenin jazǵan.
Iran Prezıdenti Ibrahım Raısı qos memlekettiń saýda-ekonomıkalyq, mádenı-gýmanıtarlyq salalardaǵy belsendi yqpaldastyǵy ekijaqty baılanystardyń damýyna tyń serpin bergenin atap ótti.
Sonymen qatar Kýba Prezıdenti Mıgel Marıo Dıas-Kanel Bermýdes, Efıopııa Prezıdenti Sahle-Vork Zevde, Palestına Prezıdenti Mahmýd Abbas, Kıpr Prezıdenti Nıkos Hrıstodýlıdıs, Islam yntymaqtastyǵy uıymynyń Bas hatshysy Hısseın Brahım Taha, Túrki memleketteri uıymynyń Bas hatshysy Kýbanychbek Ómirálıev, Túrki ınvestıtsııalyq qorynyń prezıdenti Baǵdat Ámireev jáne basqalar óz quttyqtaý jedelhattaryn joldady.
Quttyqtaý jedelhattary áli de kelip túsip jatyr.
