Memleket basshysynyń atyna Naýryz meıramyna oraı quttyqtaý jedelhattary kelip jatyr
ASTANA. KAZINFORM — Prezıdent Qasym-Jomart Toqaevtyń atyna Naýryz merekesine oraı shet memleketterdiń basshylary men halyqaralyq uıym jetekshilerinen quttyqtaý jedelhattary kelip túsip jatyr. Bul týraly Aqordanyń baspasóz qyzmeti habarlady.
Reseı Prezıdenti Vladımır Pýtın Qasym-Jomart Toqaevty Naýryz meıramymen quttyqtady.
– Reseı-Qazaqstan qarym-qatynastary strategııalyq seriktestik jáne odaqtastyq rýhynda tabysty damyp keledi. Dostas halyqtarymyzdyń ıgiligi jolynda, Eýrazııa keńistigindegi qaýipsizdik pen turaqtylyqty nyǵaıtý maqsatynda ózara tıimdi baılanystardy odan ári arttyrý úshin ortaq kúsh biriktiretinimizge senimdimin, – dep jazylǵan quttyqtaýda.
QHR Tóraǵasy Sı Tszınpın Naýryz kóktemniń kelýi men tabıǵattyń oıanǵanyn bildiretinin jazǵan. Sondaı-aq bul meıram Qazaqstan halqynyń ıgilikke, yntymaq pen órleýge umtylysymen ushtasatynyn atap ótken.
– Ekijaqty qarym-qatynastardy damytýǵa basa mán beremin. Sizben berik dostyǵymdy maqtan tutamyn. Qytaı men Qazaqstan arasyndaǵy dástúrli dostyqty nyǵaıtyp, eki eldiń máńgi ári jan-jaqty strategııalyq seriktestigin tereńdetý úshin kúsh-jigerimizdi biriktirýge daıynmyn, – delingen jedelhatta.
AQSh Prezıdenti Donald Tramp jedelhatynda Memleket basshysy men Qazaqstan halqyn yntymaq pen jańarý merekesimen quttyqtady.
– Bizdiń memleketterimizdi uzaq jyldardan beri qalyptasqan ózara tıimdi yqpaldastyq baılanystyrady. Aldaǵy ýaqytta qaýipsizdik, ekonomıka jáne basqa da salalarda jańa jetistikterge jetetinimizge senimdimin. Bizdiń jasampaz elderimiz tabysty jolǵa qadam basqan kezeńde, Amerıka halqy Qazaqstannyń egemendigin, táýelsizdigin, aýmaqtyq tutastyǵyn árdaıym qoldaıdy, – dep jazǵan Donald Tramp.
Túrkııa Prezıdenti Rejep Taııp Erdoǵan jedelhatynda Naýryzdyń san ǵasyrlyq dástúri beıbitshiliktiń, baýyrmaldyq pen kelisimniń mańyzyn eske salatynyna toqtalǵan.
– Naýryz – dúnıe júzindegi beıbitshilikke degen úmitti nyǵaıtyp, halyqaralyq dıalog pen yntymaqtastyqtyń jańa deńgeıge kóterilýine septigin tıgizedi dep oılaımyn. Elderimiz arasyndaǵy berik dostyq pen baýyrlastyq baılanys qarqyndy damyp, ekijaqty yqpaldastyǵymyz keńeıe beretinine senimdimin , – delingen quttyqtaýda.
Sonymen qatar Memleket basshysyn Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov, Túrikmenstan Halk Maslahatynyń Tóraǵasy Gýrbangýly Berdimuhamedov, Ázerbaıjan Prezıdenti Ilham Álıev, Iran Prezıdenti Masýd Pezeshkıan, Palestına Prezıdenti Mahmud Abbas, Tatarstan Raısy Rýstam Mınnıhanov, Túrki memleketteri uıymynyń bas hatshysy Kýbanychbek Ómirálıev jáne birqatar halyqaralyq uıymnyń jetekshileri men basqa da resmı tulǵalar quttyqtady.
Quttyqtaý jedelhattary áli de kelip túsip jatyr.
Aıta ketelik Memleket basshysy Qazaqstan halqyn Naýryz meıramymen quttyqtady.