Saıası táýekelderden qorǵaıtyn tetik – sarapshy Konstıtýtsııalyq sottyń sheshimine qatysty pikir bildirdi
ASTANA. KAZINFORM – Jańa Konstıtýtsııa kúshine engennen keıin Memleket basshysy Qasym-Jomart Toqaev Konstıtýtsııalyq sotqa júginip, joǵarǵy memlekettik bılikke qatysty konstıtýtsııalyq normalarǵa resmı túsindirme berýdi suraǵan bolatyn. Osyǵan baılanysty sarapshy Ǵazız Ábishev óziniń Telegram arnasynda pikir bildirdi.
Atap aıtqanda, Prezıdenttiń ótinishin qaraý qorytyndysy boıynsha Konstıtýtsııalyq sot birqatar konstıtýtsııalyq normalarǵa resmı túsindirme bergen.
– 2026 jylǵy Konstıtýtsııanyń 43-babynyń 1-tarmaǵyn, 72-babynyń 2 jáne 3-tarmaqtaryn, 83-babynyń 1-tarmaǵyn jáne 84-babynyń 3-tarmaǵyn osy konstıtýtsııalyq normalarda atalǵan laýazymdardy 1995 jylǵy Konstıtýtsııaǵa sáıkes atqaryp júrgen adamdar 2026 jylǵy Konstıtýtsııa kúshine engennen keıin tıisti qyzmetke saılanýy ne laýazymǵa taǵaıyndalýy múmkin dep túsiný kerek. Sonymen qatar atalǵan konstıtýtsııalyq normalarda belgilengen shekteýlerdi qoldaný maqsaty turǵysynan mundaı adamdardyń 2026 jylǵy Konstıtýtsııa kúshine engennen keıin tıisti qyzmetke saılanýy ne laýazymǵa taǵaıyndalýy alǵash ret saılaný ne taǵaıyndalý dep esepteledi, – delingen Konstıtýtsııalyq sottyń taratqan habarlamasynda.
Ǵazız Ábishevtiń pikirinshe, bul túsindirme prezıdenttiń ókilettik merzimin bir ret jeti jylmen shekteıtin norma qazirgi Memleket basshysyna qoldanylmaıtynyn kórsetedi. Sarapshy atalǵan shekteý kelesi prezıdenttik saılaýdan bastap barlyq kandıdattarǵa birdeı qoldanylatynyn atap ótti.
– Josparǵa sáıkes kelesi prezıdent saılaýy úsh jyldan keıin, ıaǵnı 2029 jyldyń qyrkúıeginde ótýi tıis. Osy turǵydan alǵanda, Konstıtýtsııalyq sottyń túsindirmesi saıası júıeniń turaqtylyǵyn qamtamasyz etetin ózindik konstıtýtsııalyq tetik retinde qarastyrylýy múmkin. Sonymen qatar túsindirmege sáıkes, Prezıdent Qasym-Jomart Toqaevtyń aldaǵy prezıdenttik saılaýǵa kandıdat retinde qatysýǵa quqyǵy bar. Alaıda bul onyń mindetti túrde saılaýǵa túsetinin bildirmeıdi. Biraq mundaı quqyqtyń bolýy onyń qolyndaǵy mańyzdy saıası tetik bolyp qala beredi, – delingen onyń habarlamasynda.
Sonymen qatar sarapshy Konstıtýtsııalyq Sottyń túsindirmesinen atalǵan organ sýdıalaryna qatysty da qorytyndy jasaýǵa bolatynyn aıtty.
– Zańǵa sáıkes olar bir ǵana segiz jyldyq merzimge taǵaıyndalady. Alaıda Konstıtýtsııalyq sottyń túsindirmesine sáıkes, qazirgi sýdıalar Jańa Konstıtýtsııa kúshine engennen keıin taǵy bir ret, ıaǵnı taǵy bir ǵana segiz jyldyq merzimge taǵaıyndala alady, – dep túıindedi sarapshy.
Aıta keteıik, Qazaqstanda jańa Konstıtýtsııanyń tolyqqandy kúshine enýine qajetti barlyq normatıvtik-quqyqtyq baza qalyptastyrylǵanyn jazǵanbyz.
