Memleket basshysyna Konstıtýtsııalyq komıssııa jumysynyń nátıjeleri jóninde aqparat berildi

ASTANA. KAZINFORM - Qasym-Jomart Toqaev Konstıtýtsııalyq komıssııa tóraǵasy – Konstıtýtsııalyq sot tóraǵasy Elvıra Ázimovany, Konstıtýtsııalyq komıssııa tóraǵasynyń orynbasary – Memlekettik keńesshi Erlan Qarındi jáne Konstıtýtsııalyq komıssııa múshesi – Prezıdenttiń quqyqtyq máseleler jónindegi kómekshisi Erjan Jıenbaevty qabyldady.

Bul týraly Aqordanyń baspasóz qyzmeti habarlady.

Elvıra Ázimova Komıssııanyń osyǵan deıin ótken otyrystaryndaǵy talqylaý barysynda Konstıtýtsııanyń túbegeıli jańa mátini ázirlengenin baıandady.

Komıssııa músheleri jańa preambýlanyń, birqatar baptar men bólimderdiń mazmuny tutas konstıtýtsııalyq modeldi aıtarlyqtaı jańǵyrtýǵa, saıası jáne qoǵamdyq ınstıtýttardy jetildirýge, azamattardyń quqyqtary men bostandyqtaryn qorǵaý tetikterin kúsheıtýge negiz bolatynyn atap ótti.

Osyǵan baılanysty Komıssııa músheleri atalǵan jobany Konstıtýtsııanyń jańa nusqasy retinde qarastyrý jáne ony halyqtyń nazaryna usyný úshin jarııalaý qajet ekenin jetkizdi.

Óz kezeginde Konstıtýtsııalyq komıssııa jańa Ata Zańnyń jobasy boıynsha jumystardy jalǵastyra beredi.

Prezıdenttiń pikirinshe, Konstıtýtsııalyq komıssııa aýqymdy jumys atqarǵan. Memleket basshysy Konstıtýtsııanyń jańa nusqasyn halyqtyń qaraýyna shyǵarý mańyzdy ekenin aıtty.

Kezdesý sońynda Prezıdent jańa Konstıtýtsııa týraly túpkilikti sheshimdi qazaqstandyqtar respýblıkalyq referendýmda qabyldaıtynyn taǵy da atap ótti.

Osyǵan deıin Jańa Ata zań qalaı ózgeretini týraly jazdyq.