Prezıdentke Vashıngtonda álemdik naryqqa shyqqan ІT startaptar tanystyryldy
VAShINGTON. KAZINFORM — Qasym-Jomart Toqaev Vashıngtonǵa sapary aıasynda halyqaralyq naryqqa shyqqan otandyq ІT startaptardyń negizin qalaýshylarmen kezdesti. Bul týraly Aqordanyń baspasóz qyzmeti habarlady.
Prezıdentke elimizdiń alǵashqy «syńarmúıiz» startapy – Higgsfield AI jasandy ıntellektige negizdelgen kınematografııalyq sapaly beıneni generatsııalaýǵa arnalǵan platformasy, Deep Infra – mashınalyq oqytý modelderin ornalastyrýǵa jáne iske qosýǵa arnalǵan qyzmet, Valinor – bıotehnologııa salasyndaǵy startap, ARC Drones – avtonomdy drondardy ázirleýshi, sondaı-aq basqa da perspektıvti jobalar tanystyryldy.
Qasym-Jomart Toqaevqa Silkroad Innovations tehnologııa habynyń qyzmeti týraly aqparat berildi. Ol Kremnıı alqabynda Ortalyq Azııa elderiniń talantty jastary men startaptaryna qoldaý kórsetedi.
Kezdesýge jalpy quny 1,4 mıllıard dollardy quraıtyn 20-dan asa startap ókili qatysty. Bul ulttyq ІT ekojúıesiniń ınnovatsııalyq áleýetin tanytady.
Memleket basshysy joǵary tehnologııa salasyndaǵy otandyq kompanııalardyń jetistikterin joǵary baǵalap, aldaǵy úsh jylda Qazaqstandy tolyq tsıfrlyq elge aınaldyrý jónindegi strategııalyq mindettiń mańyzyn atap ótti.
– Prezıdent retinde barshańyzdy qoldaımyn. Jumystaryńyz elimizdiń bolashaǵy úshin óte qajet. Tsıfrlandyrý men HighTech memleketimizdiń basty basymdyqtarynyń biri sanalady. Men bul týraly Joldaýymda aıttym, – dedi Qasym-Jomart Toqaev.
Aıta ketelik Qazaqstan men AQSh asa mańyzdy mıneraldar týraly memorandýmǵa qol qoıǵan edi.
Sonymen qatar Prezıdent AQSh Memlekettik hatshysy Mark Rýbıomen jáne Donald Tramp Ákimshiliginiń basqa da ókilderimen kezdesken edi.
Sondaı-aq Qasym-Jomart Toqaev sanaýly saǵattardan keıin Donald Tramppen kezdesetini týraly jazǵan edik.