Memleket basshysyna alǵashqy tsıfrlyq dırektorlar keńesiniń múshesi tanystyryldy

ASTANA. KAZINFORM - «Samuryq-Qazyna» qory Memleket basshysy Qasym-Jomart Toqaevqa SKAI (Samruk-Kazyna Artificial Intelligence) neırojelisin – Dırektorlar keńesiniń tsıfrlyq táýelsiz múshesin tanystyrdy.

«Samuryq-Qazyna» Qorynyń resmı Telegram-kanalynyń habarlaýynsha, SKAI - jasandy ıntellekt negizinde ázirlengen jáne óńir boıynsha Dırektorlar keńesiniń daýys berý quqyǵy bar alǵashqy tsıfrlyq táýelsiz múshesi.

Tanystyrý rásimi Astanada Digital Bridge halyqaralyq forýmy aıasynda ótti.

SKAI korporatıvtik basqarýdyń ashyqtyǵy men sapasyn arttyrýdyń jańa quraly bolmaq.

Neırojeli ishki jáne syrtqy normatıvtik qujattardy, 2008 jyldan bergi Dırektorlar keńesiniń sheshimderin jáne Qordyń qurylǵan sátinen bastap jınaqtalǵan basqa da materıaldardy taldaıdy.

Bul - Keńestiń áldeqaıda utymdy ári saralanǵan sheshimder qabyldaýyna múmkindik beredi.

- Jasandy ıntellekt negizindegi neırojeliniń Dırektorlar keńesine taǵaıyndalýy – bul naǵyz kvanttyq serpilis: tehnologııa men adamdar sheshimdi birlese qabyldaıdy, al tsıfrlandyrý tek qana bıznes-protsestermen shektelmeı, basqarý fılosofııasynyń bir bóligine aınalýda, – dedi «Samuryq-Qazyna» AQ basqarma tóraǵasy Nurlan Jaqypov.

Qaýipsizdik te basty nazarda: SKAI «Qazaqtelekomnyń» ekinshi sýperkompıýteri Al Farabium-nyń jabyq kontýrynda jumys isteıdi.

Osylaısha, aqparat el aýmaǵynan tysqary taramaıdy, al joǵary esepteý qýaty taldaýdyń senimdiligi men jyldamdyǵyn qamtamasyz etedi. Júıeniń negizi retinde qazaqstandyq Alem LLM tildik modeli qoldanylǵan.

Neırojelini qoldanysqa engizý – Qordyń tsıfrlandyrý men basqarýdy transformatsııalaýǵa baǵyttalǵan uzaq merzimdi strategııasynyń bir bóligi.

Aıta keteıik, Astanada Digital Bridge 2025 halyqaralyq tehnologııalyq forýmy ótip jatyr.