Memleket basshysyna 2025 jylǵa arnalǵan monetarlyq retteý jospary baıandaldy

ASTANA. KAZINFORM — Prezıdent Qasym-Jomart Toqaev Ulttyq bank tóraǵasy Tımýr Súleımenovti qabyldady, dep habarlaıdy Aqordanyń baspasóz qyzmeti.

Memleket basshysyna Ulttyq banktiń byltyr júzege asyrǵan aqsha-kredıt saıasatynyń qorytyndysy týraly esebi men 2025 jylǵa arnalǵan monetarlyq retteý jospary baıandaldy.

Prezıdentke Qazaqstan ekonomıkasy men qarjy júıesiniń ahýaly, iskerlik belsendilik, ınflıatsııa faktorlary, sondaı-aq baǵany turaqtandyrý jáne ınflıatsııa deńgeıin ortamerzimdi maqsatqa sáıkes 5 paıyzǵa jetkizý úshin qabyldanyp jatqan sharalar jóninde málimet berildi.

Qasym-Jomart Toqaevqa 2024 jyldyń qorytyndysy boıynsha ınflıatsııa Ulttyq banktiń boljaǵan sheginde qalyptasqany, ıaǵnı 8,6% paıyzdy quraǵany aıtyldy. Tımýr Súleımenovtiń aıtýynsha, syrtqy ınflıatsııalyq qysym kúsheıip, ishki ınflıatsııalyq táýekelder áli de saqtalyp otyr.

Sonymen qatar Memleket basshysy Ulttyq qordyń aktıvteri, altyn-valıýta rezervteri jáne Biryńǵaı jınaqtaýshy zeınetaqy qorynyń jaı-kúıi jóninde aqparatty tyńdady. Atap aıtqanda, 2024 jyly Ulttyq qor aktıvterin basqarýdan túsken tabys 7,5 paıyzǵa artyp, 4,5 mıllıard dollardy quraǵan. Al Ulttyq banktiń altyn-valıýta rezervteri 45,8 mıllıard dollarǵa jetip, 27,4 paıyzǵa ulǵaıǵan. BJZQ-nyń zeınetaqy aktıvterin basqarýdan túsken ınvestıtsııalyq tabys 3,4 trıllıon teńgeni qurady. Al kiris kórsetkishi ınflıatsııadan eki ese asyp túsip, 17,8 paıyzǵa jetti.

Prezıdentke valıýta naryǵyndaǵy jaǵdaı tanystyrylyp, teńgeniń turaqtylyǵyn qamtamasyz etý úshin júzege asyrylyp jatqan sharalar týraly baıandaldy.

Budan bólek, Tımýr Súleımenov bank sektoryndaǵy jaǵdaıdyń turaqtylyǵy, depozıtter bazasynyń qalypty ósiminiń jalǵasýy, sondaı-aq qarjy turaqtylyǵyn qamtamasyz etý sharalary men makroprýdentsııalyq saıasattyń tıimdiligin arttyrý jospary jóninde aıtty.

Ulttyq bank tóraǵasy Prezıdentke Ulttyq tsıfrlyq qarjy ınfraqurylymyn damytý nátıjeleri men Antıfrod-ortalyǵynyń qyzmetin tanystyrdy.

Kezdesý sońynda Memleket basshysy ınflıatsııany tejep, qarjy sektorynyń turaqtylyǵyn qamtamasyz etý mańyzdy ekenine nazar aýdardy. Bul rette Qasym-Jomart Toqaev Ulttyq bank pen Úkimet makroekonomıkalyq saıasatty úılesimdi júrgizýi qajet ekenin atap ótip, Ulttyq bank qyzmetine qatysty birqatar naqty tapsyrma berdi.

Osyǵan deıin Prezıdent «Qazposhta» AQ basqarma tóraǵasy Ásel Janasovany qabyldaǵanyn jazdyq.