Konstıtýtsııalyq reforma: Prezıdent jumys tobymen birge negizgi tásilderdi talqylady
ASTANA. KAZINFORM — Astanada Prezıdent Qasym-Jomart Toqaevtyń qatysýymen Parlamenttik reforma jónindegi jumys tobynyń otyrysy ótti, dep habarlaıdy Aqordanyń baspasóz qyzmeti.
Jıynda Memlekettik keńesshi Erlan Qarın Prezıdentke Jumys tobynyń atqarǵan qyzmeti týraly baıandap, Parlamentti transformatsııalaýǵa qatysty usynylyp otyrǵan konstıtýtsııalyq ózgeristerdiń kólemi aýqymdy ekenine nazar aýdardy.
Memlekettik keńesshi Jumys toby músheleriniń ortaq pikirin jetkizip, bul ózgerister saıası júıeni ýaqyt talabyna saı jańǵyrtýǵa yqpal etetinin aıtty.
Prezıdenttiń quqyqtyq máseleler jónindegi kómekshisi Erjan Jıenbaev azamattardan kelip túsken usynystar negizinde Konstıtýtsııalyq reforma jónindegi jumys toby músheleri ázirlegen basty tásilder týraly baıandady. Atap aıtqanda, byltyrǵy qazan aıynan beri ótip kele jatqan otyrystarda jańa Parlamentke qatysty máselelerdiń bári qaraldy. Onyń ishinde depýtattar sany, ókilettik merzimderi, saılaý tártibi, bir palataly Parlamenttiń zań shyǵarý tetikteri, sondaı-aq onyń bıliktiń ózge ınstıtýttarymen ózara is-qımyl máseleleri qamtyldy.
Parlamentarızm ınstıtýtynyń dırektory Natalıa Pan azamattardan, sarapshylardan, qoǵamdyq birlestikterden e-Otinish jáne eGov platformalary arqyly kelip túsken usynystar týraly aqparat berdi.
Birneshe aı ishinde saıası partııalardyń barlyǵy, ondaǵan úkimettik emes uıym, bıznes-qoǵamdastyq ókilderi, quqyqtanýshy ǵalymdar men sarapshylar konstıtýtsııalyq reformaǵa qatysty óz bastamalaryn joldaǵan. Parlamenttik reformadan bólek, Jumys tobyna azamattardan memlekettik qurylymnyń jalpy máseleleri men saıası jáne qoǵamdyq ınstıtýttardy jetildirýge qatysty 1,6 myńǵa jýyq usynys kelip tústi.
Parlament Májilisindegi «Amanat» partııasy fraktsııasynyń jetekshisi Elnur Beısenbaev jáne «Aq jol» partııasynyń kóshbasshysy Azat Perýashev, Jalpyulttyq sotsıal-demokratııalyq partııa» fraktsııasynyń basshysy Ashat Rahymjanov parlamenttik reforma aıasynda júzege asyrylatyn konstıtýtsııalyq ózgeristerdiń aýqymdy ekenin málimdedi. Olar óńirlerde Parlament depýtattarynyń jumys kezdesýleri barysynda azamattardyń aldaǵy saıası reformaǵa aıryqsha qyzyǵýshylyq tanytyp otyrǵanyn jetkizdi.
Sondaı-aq jıynda Parlament Senatynyń Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy Nurlan Beknazarov, Parlament Májilisiniń depýtattary Únzıla Shapaq, Marat Báshimov, Nıkıta Shatalov, saıasattanýshy Bórihan Nurmuhamedov pikirlerin bildirdi.
Otyrysty qorytyndylaǵan Memleket basshysy aldaǵy konstıtýtsııalyq reformany talqylaý bastalǵaly beri jarty jylǵa jýyq ýaqyt ótkenin eske saldy.
Osy kezeń ishinde qoǵamda eldiń joǵary zań shyǵarýshy organyn transformatsııalaýdyń maqsattary men mindetterine qatysty durys túsinik qalyptasty. Qasym-Jomart Toqaev qyrkúıek aıyndaǵy halyqqa arnaǵan Joldaýynan keıin órbigen qoǵamdyq pikirtalastardy muqııat qadaǵalap otyrǵanyn jetkizdi. Memleket basshysy talqylaý nátıjesin, saraptama qorytyndylaryn, usynylǵan túzetýlerdiń jobalaryn, sondaı-aq konstıtýtsııalyq reformaǵa qatysty azamattardan kelip túsken usynystardy egjeı-tegjeıli zerdelep jatyr.
Saıası júıeni odan ári reformalaýdyń mańyzy men mazmunyna toqtalǵan Prezıdent ınstıtýtsıonaldyq negizdi tereń jańǵyrtý jáne zań shyǵarýshy bılik tarmaǵyn júıeli túrde qaıta formattaý qajet ekenin aıtty.
— Erteń Ulttyq quryltaı otyrysynda men elimizdiń taǵdyryna qatysty bul másele boıynsha naqty pikirlerimdi aıtamyn. Naqtylaı aıtqanda, elimizdiń sapalyq turǵydan múldem jańa saıası turpaty qalyptasyp jatyr. Parlamenttik reformany júzege asyrý úshin Konstıtýtsııanyń birden birneshe bólimin qaıta qaraý qajet bolady. Sondyqtan Ata zańymyzǵa osyǵan deıin engizilgen ózgertýlerdi eskersek, Jumys toby usynyp otyrǵan túzetýler jobasy Qazaqstannyń shyn máninde jańa Konstıtýtsııasy týraly aıtýǵa múmkindik beredi, — dedi Memleket basshysy.
Budan buryn Tramp Toqaev pen Qazaqstandy Beıbitshilik keńesine shaqyrǵanyn jazǵan edik.