Memleket basshysy «Jol ǵylymı-óndiristik ortalyǵy» JShS dırektory Baǵdat Teltaevty qabyldady
ALMATY. KAZINFORM – Prezıdent Qasym-Jomart Toqaev jol qurylysy jáne jol jabyndylary mehanıkasyn zertteýshi ǵalym Baǵdat Teltaevpen kezdesti. Bul týraly Aqordanyń baspasóz qyzmeti málim etti.
Júzdesýde Almaty qalasyndaǵy jáne elimizdegi jol ınfraqurylymyn damytý perspektıvalary, ınnovatsııalyq tehnologııalardy engizý jáne atalǵan salaǵa maman daıarlaý máseleleri talqylandy.
Memleket basshysyna qalalardyń qarqyndy damýyna baılanysty týyndaǵan, kólik ınfraqurylymyna aıtarlyqtaı salmaq túsiretin basty problemalar men syn-qaterler týraly málimet berilip, olardy sheshý joldary jóninde baıandaldy.
Atap aıtqanda, Baǵdat Teltaev jol qurylysyna quramynda polımer qosyndylary bar asfaltbeton qoldaný tájirıbesiniń sátti ótkenin jetkizdi. Júrgizilgen synaq nátıjesinde atalǵan tehnologııa joldyń oıylýyna jáne jaryqshaqtardyń paıda bolýyna, sondaı-aq taǵy da basqa klımattyq áserlerge tózimdi ekeni anyqtaldy.
Prezıdent Qasym-Jomart Toqaev salany damytýǵa qosqan úlesi úshin Baǵdat Teltaevqa rızashylyǵyn bildirip, jol ınfraqurylymynyń sapasy men qaýipsizdigin jaqsartý úshin ǵylymı zertteýlerdi jalǵastyrýdyń jáne jol qurylysyna ozyq tehnologııalardy engizýdiń mańyzdy ekenine nazar aýdardy. Aıtylǵan usynystar negizinde Úkimetke jáne salalyq mınıstrlikke tıisti tapsyrmalar beriledi.
