Memleket basshysy Joǵary Eýrazııalyq ekonomıkalyq keńestiń shaǵyn quramdaǵy otyrysyna qatysty
ASTANA. KAZINFORM –Prezıdent Qasym-Jomart Toqaevtyń tóraǵalyǵymen Joǵary Eýrazııalyq ekonomıkalyq keńestiń shaǵyn quramdaǵy otyrysy ótti, dep habarlaıdy Aqorda.
Memleket basshysy búgingi kúnniń sımvolıkalyq mánine nazar aýdardy. Dál osy kúni, ıaǵnı, 2014 jyly 29 mamyrda Qazaqstan elordasynda Eýrazııalyq ekonomıkalyq odaq týraly shartqa qol qoıylǵan bolatyn.
– Bul ýaqıǵa eýrazııalyq ıntegratsııanyń mańyzdy kezeńi retinde este qaldy. Odaq qurylǵan sátten beri eýrazııalyq «bestiktiń» basty yntymaqtastyq alańyna aınaldy. Osyǵan oraı barsha áriptesimdi Eýrazııalyq ekonomıkalyq odaq kúnimen quttyqtaýǵa ruqsat etińizder. Birlestik odan ári damyp, elderimiz ben halyqtarymyzdyń ıgiligine qyzmet ete bersin! Búgingi shaǵyn formattaǵy kezdesý barysynda biz syrtqy saýdaǵa, jasandy ıntellektini damytý bastamalaryna qatysty mańyzdy máselelerdi talqylaımyz. Bul týraly mazmundy áńgimemiz keshe ekonomıkalyq forým aıasynda bastaldy. Jıynymyz ádettegideı konstrýktıvti sıpatta ótip, ózara tıimdi sheshimder qabyldanatynyna senimdimin, – dedi Qazaqstan Prezıdenti.
Qasym-Jomart Toqaevpen qatar Keńes otyrysyna Belarýs Respýblıkasynyń Prezıdenti Aleksandr Lýkashenko, Qyrǵyz Respýblıkasynyń Prezıdenti Sadyr Japarov, Reseı Federatsııasynyń Prezıdenti Vladımır Pýtın, Armenııa Respýblıkasynyń Vıtse-premeri Mger Grıgorıan jáne Eýrazııalyq ekonomıkalyq komıssııa alqasynyń tóraǵasy Baqytjan Saǵyntaev qatysty.
Aıta keteıik, EAEO-ǵa múshe memleketter basshylary Eýrazııa ekonomıkalyq forýmy aıasyndaǵy kórmeni tamashalady.
