Memleket basshysy Joǵarǵy Sot tóraǵasy Aslambek Merǵalıevti qabyldady
ASTANA. KAZINFORM – Prezıdentke sot tóreligin iske asyrýdyń byltyrǵy qorytyndylary men aldaǵy kezeńge arnalǵan jospary baıandaldy. Bul týraly Aqorda habarlady.
Aslambek Merǵalıev sot tóreliginiń sapasy turaqty túrde saqtalǵanyn aıtty.
Joǵary turǵan sot satylary sot aktileriniń 98,8 paıyzyn túzetpegen. Ákimshilik ádilet aıasyndaǵy júıeli sharalardyń nátıjesinde memlekettik organdarmen aradaǵy daýlar kezinde azamattardyń quqyǵyn qorǵaý kórsetkishteri jaqsardy.
Ákimshilik organdar men laýazymdy tulǵalardyń 4,5 myń aktisi zańsyz dep tanyldy.
Tatýlastyrý rásimderin qoldaný úlesi azamattyq isterde – 45,9 paıyzdy, ákimshilik isterde 11,8 paıyz boldy. Ákimshilik quqyq buzýshylyqtar týraly is sany 11,8 paıyzǵa azaıdy (500 myńnan 441 myńǵa deıin tómendedi).
Raqymshylyq aktisin jarııalaý arqyly 583 adam jazadan, 5 myńnan asa sottalýshy jazasyn odan ári óteýden bosatyldy, 9,2 myń adamnyń jaza merzimi qysqartyldy. Qamaýda ustaýǵa ruqsat berýden bas tartý úlesi 25,7 paıyzdan 37,5 paıyzǵa deıin artty.
Onyń ornyna úı qamaǵyna alý eki ese jıi taǵaıyndaldy (2786-dan 5019-ǵa deıin ulǵaıdy). Buǵan elektrondy brasletti keńinen qoldaný yqpal etti (954 adamnan 2283 adamǵa deıin). Bul bıýdjet shyǵyndaryn ońtaılandyrýǵa jáne tergeýdegi azamattardyń qoǵammen qarym-qatynasyn saqtaýǵa múmkindik beredi.
Kassatsııalyq sotqa suranystyń joǵary ekeni baıqaldy. Jarty jyl ishinde Kassatsııalyq sotqa 16,2 myńnan asa aryz-shaǵym men narazylyq túsken. Byltyrǵy osy kezeńde Joǵarǵy sotqa 9,8 myń aryz-shaǵym jasalǵan bolatyn. Kassatsııa arqyly túzetilgen sot aktileriniń úlesi azamattyq isterde – 3 paıyzdan 18 paıyzǵa, qylmystyq isterde 8 paıyzdan 28 paıyzǵa deıin ulǵaıdy.
Ulttyq statıstıka bıýrosynyń málimetine sáıkes, sot júıesine absolıýtti senim deńgeıi 3 jylda, ıaǵnı 2023 jyldan beri 55,2 paıyzdan 63,2 paıyzǵa deıin óskeni jóninde aqparat berdi.
Prezıdent «Zań jáne tártip» qaǵıdatyn júzege asyrýdyń, azamattarǵa ádil sot tóreligin qamtamasyz etýdiń, sondaı-aq zań ústemdigine basymdyq berip, qoǵamnyń sot júıesine senimin arttyrýdyń mańyzyn atap ótti.