Memleket basshysy JI qaýipsizdigin qamtamasyz etetin «Vashıngton modelin» quptady
ASTANA. KAZINFORM — Prezıdent Prezıdent Jasandy ıntellektini damytý jónindegi keńestiń úshinshi otyrysy barysynda JI tehnologııasyn qaýipsiz ári jaýapkershilikpen damytýdy kózdeıtin «Vashıngton modelin» quptaıtynyn aıtty, dep habarlaıdy Aqordanyń baspasóz qyzmeti.
Qasym-Jomart Toqaev jaqynda Prezıdent Tramp pen iri tehnologııalyq kompanııalar basshylary qol qoıǵan jasandy ıntellektiniń ozyq tehnologııalaryn qaýipsiz ári jaýapkershilikpen damytý týraly erikti kelisimniń strategııalyq salmaǵyna nazar aýdardy.
— Der kezinde kóterilgen osy mańyzdy bastamany quptaımyn. Jasandy ıntellektige qatysty qaýip-qaterler eshqandaı shekaraǵa baǵynbaıtynyn bári túsinedi. Sondyqtan memleketter men bıznes qaýymdastyq tarapynan úılesimdi áreket qajet. Vashıngtonda qol qoıylǵan kelisimdi sarapshylar muqııat zerdelegen soń múddeli memleketter jasandy ıntellekt salasyn jahandyq deńgeıde retteıtin úlgi retinde qarastyrýyna bolady. «Vashıngton modeli» BUU aıasyndaǵy halyqaralyq kelisimge negiz bolýǵa laıyq dep oılaımyn. Qazaqstan jasandy ıntellektini qaýipsiz ári jaýapkershilikpen damytýdy qoldaıdy. Osy oraıda, atalǵan másele boıynsha syndarly halyqaralyq dıalog júrgizýge alań usyna alamyz. Keńes is júzinde mańyzdy ekenin kórsetti. Sondyqtan Keńes múshelerinen qysqa merzim ishinde Qazaqstannyń osy salaǵa qatysty halyqaralyq bastamasyna naqty usynys berýdi suraımyn. Ortaq ustanym bıyl jeltoqsan aıynda Maıamıde ótetin G20 sammıtinde tanystyrylady, — dedi Memleket basshysy.
Aıta keteıik, jıynda Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev, «Samuryq-Qazyna» AQ basqarma tóraǵasy Nurlan Jaqypov, Ónerkásip jáne qurylys mınıstri Ersaıyn Naǵaspaev, Sinovation Venture jáne 01.AI bas dırektory Lı Kaı-Fý, Abý-Dabı Ámirliginiń densaýlyq saqtaý departamentiniń tóraǵasy, G42 International bas dırektory Mansýr Ál-Mansýrı, Polynome Group negizin qalaýshy Aleksandr Hanın jáne Tsınhýa ýnıversıteti janyndaǵy JI-ındýstrııany zertteý ınstıtýtynyń negizin qalaýshy ıAtsın Chjan sóz sóıledi.
Budan buryn Toqaev óndiriste JI qoldanýdyń biryńǵaı mehanızmin qurýdy tapsyrdy.
