Kostenko shahtasyndaǵy apat: Memleket basshysy jedel shtabtyń otyrysyn ótkizdi
Prezıdent Qasym-Jomart Toqaev Qaraǵandy oblysyndaǵy «ArselorMıttal Temirtaý» aktsıonerlik qoǵamyna qarasty Kostenko atyndaǵy shahtada bolǵan apat saldaryn joıý jónindegi jedel shtab otyrysyn ótkizdi, dep habarlaıdy Kazinform Aqordanyń baspasóz qyzmetine silteme jasap.
Eń aldymen, qutqarý jumystarynyń barysy jáne qazirgi ahýal týraly Tótenshe jaǵdaılar mınıstri Syrym Sháriphanov baıandady.
– Apat kezinde shahtada 252 adam bolǵan. 206 qyzmetker óz betinshe kóterildi. Qazirgi ýaqytta apattyq-qutqarý jumystaryna 10 bólimshe, 55 taý-ken qutqarýshy jáne 12 tehnıka jumyldyryldy. Jumystar eki óndirý ýchaskesi aýmaǵynda júrgizilýde. Jańa órt oshaqtary baıqalmaıdy. Jumys táýlik boıy jalǵasady, – dedi Syrym Sháriphanov.
Memleket basshysy Tótenshe jaǵdaılar mınıstriniń baıandamasyn tyńdap bolǵannan keıin izdestirý-qutqarý jumystaryn barlyq qajetti kúshti tarta otyryp, kúsheıtilgen rejımde jalǵastyrýdy tapsyrdy.
– Jańa ǵana azamattar ár 10-15 mınýt saıyn aqparat berip turý máselesin kóterdi. Múmkindiginshe qamtamasyz etý kerek. Halyqpen qarym-qatynas jasaıtyn bir ókil bolsyn. Jurtshylyqty aqparatsyz qaldyrýǵa bolmaıdy. Bul – óte shetin ári múldem jol berýge bolmaıtyn másele. Biz kún-tún demeı, sońyna deıin kúresýimiz kerek, – dedi Qasym-Jomart Toqaev.
Munan soń Densaýlyq saqtaý mınıstri Ajar Ǵınııat zardap shekken azamattarǵa kórsetilip jatqan medıtsınalyq kómek týraly málimet berdi.
– Medıtsınalyq kómek jedel ári tolyq kórsetilip jatyr. Ártúrli deńgeıde gazben ýlanǵandar toksıkologııa bólimshesinde em alýda. Medıtsınalyq kómek kórsetýge barlyq dáriger jumyldyryldy, – dedi Ajar Ǵınııat.
Sonymen qatar Eńbek jáne halyqty áleýmettik qorǵaý mınıstri Svetlana Jaqypova qaza tapqan kenshilerdiń otbasylaryna qandaı áleýmettik kómek kórsetiletinin aıtty.
– Qaza tapqan azamattardyń otbasylaryna asyraýshysynan aırylýyna baılanysty járdemaqy taǵaıyndalady. Ol respýblıkalyq bıýdjetten, áleýmettik saqtandyrý qorynan jáne ómirdi saqtandyrý kompanııasynan tólenedi. Járdemaqy kóleminiń jalpy ortasha mólsheri asyraýyndaǵy adamdar 18 jasqa tolǵanǵa deıin aı saıyn 400-500 myń teńgeden bastalady. Eger balalar joǵary oqý oryndarynda bilim alyp jatqan bolsa, onda 23 jasqa deıin tólenedi. Ázirge barlyq tólemdi óteý «ArselorMıttal Temirtaý» kompanııasyna júkteledi. Kásiporyn ujymdyq shartqa sáıkes jyldyq tólem táýekelderin tóleýge mindetti. «ArselorMıttal Temirtaý» kompanııasy jerleý rásimderine baılanysty barlyq shyǵyndy, sondaı-aq balalardy joǵary oqý oryndarynda oqytýdy óz moınyna alýǵa tıis, – dedi Svetlana Jaqypova
Premer-Mınıstr Álıhan Smaıylov Úkimet «ArselorMıttal Temirtaý» kompanııasynyń aktsıonerlerimen aldyn ala ýaǵdalastyqqa qol jetkizgenin jáne kásiporynǵa tıesili menshik quqyǵyn Qazaqstan Respýblıkasynyń paıdasyna berý jónindegi mámileni resimdeý protsesi aıaqtalýǵa jaqyn ekenin baıandady.
Úkimettik komıssııa músheleriniń baıandamalaryn tyńdaǵan Prezıdent apatty joıý jáne kenshilerdi qutqarý úshin barlyq sharany qabyldaýdy, sondaı-aq qaza tapqan jáne zardap shekken azamattardyń otbasylaryna jan-jaqty kómek kórsetý jóninde tapsyrma berdi.
– Sizderdiń mindetterińiz – adamdarmen tikeleı jumys isteý, kezdesý, sondaı-aq jedel topty qajetti qural-jabdyqtarmen qamtamasyz etý. Biz qazir qalyptasqan jaǵdaıdy túsindirý, eń bastysy, sheshim qabyldaý úshin jumyla jumys isteýimiz kerek. Jergilikti ákimdik tıisti sheshim qabyldaýy qajet. Kásiporynnyń suranystaryna súıene otyryp, qajetti nárseniń bárin anyqtańyzdar. Úkimettik komıssııa barlyq máseleni pysyqtaýǵa tıis. Men ne isteý kerek ekenin aıttym. Árkim ózine qatysty jumysty biledi. Mınıstrler, basshylar ózderiniń jumys tásilderin bilýi kerek. Prezıdent ár oqıǵa saıyn kelip, tapsyrma beredi dep kútip otyrýǵa bolmaıdy. Vadım Borısovıch Basınge kásiporyndy basqarýdy óz qolyna alýdy tapsyramyn. Úkimet pen ákimdikke jan-jaqty tıisti kómek kórsetýdi, Tótenshe jaǵdaılar mınıstrligine múddeli qurylymdarmen birlesip, apat saldaryn joıý jáne kenshilerdi qutqarý úshin barlyq sharalardy qabyldaýdy tapsyramyn. Іshki ister mınıstrligi zardap shekken adamdardyń otbasylarymen jumys isteýi kerek. Úkimettik komıssııaǵa azamattardyń qaza bolýyna ákep soqtyrǵan órttiń mán-jaıyn tergeýdi, barlyq kinálilerdi jaýapqa tartýdy tapsyramyn, – dedi Memleket basshysy.
