Memleket basshysy Jasyl klımat qorynyń atqarýshy dırektory Mafalda Dýarteni qabyldady
ASTANA. KAZINFORM – Kezdesýde Qazaqstan men Jasyl klımat qorynyń yntymaqtastyǵyn nyǵaıtý perspektıvasy talqylandy.
Prezıdent Qasym-Jomart Toqaev elimiz qorshaǵan ortany qorǵaýǵa, sonyń ishinde orman qoryn saqtaý men kóbeıtýge, tabıǵı resýrstardy ońtaıly paıdalanýǵa erekshe kóńil bóletinin atap ótti.
Qazaqstan kelesi jyly Aımaqtyq klımat sammıtin ótkizýdi josparlap otyr. Bul is-sharanyń negizgi maqsaty – ózekti máselelerdiń sheshimin birlesip izdeý, tabıǵat ózgeristerine beıimdelý, azyq-túlik pen sý qaýipsizdigin qamtamasyz etý.
Óz kezeginde Mafalda Dýarte klımat problemalaryn sheshýge baǵyttalǵan Qazaqstannyń kúsh-jigerine qoldaý bildirip, Ulttyq beıimdelý josparynyń oryndalýyna joǵary baǵa berdi. Tabıǵat apattarynyń táýekelderin basqarý jáne erte qulaqtandyrý júıelerin engizýdi qarastyratyn atalǵan joba Jasyl klımat qorynyń jáne BUU Damý baǵdarlamasynyń qatysýymen júzege asyrylyp jatyr.
Budan bólek, áńgimelesý barysynda tabıǵatty aıalaý jáne qoǵamnyń ekologııalyq mádenıetin jetildirý mańyzdy ekeni aıtyldy.
Aıta keteıik, Prezıdent jarlyǵymen birneshe elde elshi taǵaıyndaldy.