Memleket basshysy jasandy ıntellektini damytý máselesine aıryqsha nazar aýdardy

TAShKENT. KAZINFORM — Bul týraly Qasym-Jomart Toqaev Qazaqstan men Ózbekstan prezıdentteri Joǵary memleketaralyq keńestiń ekinshi otyrysynda aıtty. 

– Qazaqstanda memlekettik basqarýdyń tıimdiligin jáne azamattardyń turmys sapasyn jaqsartý maqsatynda memlekettik qyzmetterdi tsıfrlandyrýǵa jáne IT tehnologııalardy damytýǵa basa mán beriledi. Alem.ai Halyqaralyq jasandy ıntellekt ortalyǵy ashyldy, osy saladaǵy Zertteý ýnıversıtetiniń negizi qalanýda, ulttyq sýperkompıýter iske qosyldy. Jalpy, Qazaqstandy tsıfrlyq elge aınaldyrý mindeti qoıyldy. Ózbekstan da tsıfrlandyrýǵa jáne jasandy ıntellekt tehnologııasyn damytýǵa baǵyt alǵanyn bilemiz. Atalǵan salada birqatar jetistikke qol jetkizdi. Ózbek kompanııalaryn tyǵyz yntymaqtastyq ornatyp, osynaý keleshegi zor salada birlesken jobalardy júzege asyrýǵa shaqyramyz. Astana Hub pen IT Park Uzbekistan arasyndaǵy yntymaqtastyq osyndaı tabysty sınergııaǵa mysal bola alady, – dedi Prezıdent.

Memleket basshysynyń aıtýynsha, mádenı-gýmanıtarlyq baılanystardyń órisi keńeıe bastady. Bul rette Prezıdent mádenıet kúnderin ótkizý, shyǵarmashylyq ıntellıgentsııa, jastar arasynda belsendi dıalog qalyptastyrý, kórnekti tulǵalarǵa eskertkish ornatý, sondaı-aq Ózbekstan men Qazaqstan joǵary oqý oryndarynyń fılıaldaryn ashý máselelerin qozǵady.

Qasym-Jomart Toqaev qol jetkizilgen ýaǵdalastyqtar qos halyqtyń ıgiligi jolynda san qyrly baılanystardy odan ári tereńdetýge septigin tıgizetinine senim bildirdi. 

Aıta ketelik Memleket basshysy Ózbekstan Prezıdenti Shavkat Mırzıeevpen kelissóz júrgizgeni týraly jazǵan edik.