Memleket basshysy «Jasandy ıntellekt týraly» zańǵa qol qoıdy
ASTANA. KAZINFORM — Zań arqyly jasandy ıntellekt júıeleri qyzmetiniń negizgi qaǵıdattary engizildi, dep habarlaıdy Aqordanyń baspasóz qyzmeti.
Aqorda taratqan aqparatqa sáıkes, jasandy ıntellekt júıeleri aqparattandyrý nysany retinde anyqtaldy.
— Endi jasandy ıntellekt adamnyń belgili bir mindetterdi oryndaý quraly retinde qarastyrylady. Osyny eskere otyryp, zańda jaýapkershilik jáne baqylaý qaǵıdattary bekitildi. Soǵan sáıkes, menshik ıeleri men paıdalanýshylar jasandy ıntellekt júıelerin qoldaný kezinde óziniń atqaratyn róline qaraı jaýap beredi. Menshik ıeleri men paıdalanýshylarǵa jasandy ıntellekt júıeleriniń jumys isteýi máseleleri boıynsha táýekelderdi basqarý, qaýipsizdik pen senimdilikti qamtamasyz etý, qoldaý kórsetý mindetteri júktelgen, — delingen qujatta.
Sonymen qatar zańdylyq, ádilettilik, teńdik, ashyqtyq jáne túsiniktilik, adam ıgiligine basymdyq berý, onyń sheshim qabyldaýdaǵy erkindigi, derekterdi qorǵaý jáne qupııalylyq, qaýipsizdik pen qorǵanys qaǵıdattary bekitildi.
Jeke jáne zańdy tulǵalardyń quqyqtaryn qorǵaý, sondaı-aq quqyqtyq tártipti qamtamasyz etý maqsatynda Qazaqstan Respýblıkasynyń aýmaǵynda birqatar múmkindikterge ıe jasandy ıntellekt júıelerin qurýǵa jáne paıdalanýǵa tyıym salyndy (túpsanalyq, manıpýlıatsııalyq nemese jeke derekter týraly zańnamany buzý arqyly jeke derekterdi jınaý jáne óńdeý ádisterin qoldaný; basqa da múmkindikter).
Jasandy ıntellektini qoldaný nátıjesinde jasalǵanynan habardar bolý úshin mundaı taýarlardy, jumystardy jáne kórsetiletin qyzmetterdi tańbalaý talaby engizildi.
Jasandy ıntellekt júıelerin jasaýǵa jáne údemeli damytýǵa arnalǵan platformalar qurýdyń álemdik tájirıbesin eskere otyryp, ulttyq jasandy ıntellekt platformasynyń qyzmetine qatysty zańnamalyq negizder qalyptastyryldy. Platforma shekteýli merzim ishinde baǵdarlamalyq ónimderdi, jasandy ıntellekt modelderin ázirleýge, oqytýǵa jáne synaqtan ótkizýge paıdalanylady.
Zańǵa engizilgen túzetýlerdiń birinshi blogy zańnamalyq aktilerdi «Jasandy ıntellekt týraly» Zańmen sáıkestendirýge baǵyttalǵan.
Túzetýlerdiń ekinshi blogy zańnamany ózge máseleler boıynsha jetildirýdi kózdeıdi. Zań qamtamasyz etilmegen tsıfrlyq aktıvterdiń Qazaqstan Respýblıkasynyń aýmaǵyndaǵy aınalymyn retteıdi. Buǵan deıin qamtamasyz etilmegen tsıfrlik aktıvterdiń aınalymy tek «Astana» Halyqaralyq qarjy ortalyǵynyń (AHQO) aýmaǵynda ǵana ruqsat etilgen edi.
Azamattardyń jeke derekterin qorǵaý amaldaryn kúsheıtý maqsatynda jeke derekterdi óńdeýge kelisim berý merzimine qatysty talap engizildi. Endi bul merzim jeke derekterdi jınaý jáne óńdeý maqsatyna jetý úshin qajetti merzimnen aspaýǵa tıis. Sýbekt nemese onyń zańdy ókili ıesin, operatordy, úshinshi tarapty eskertip, jeke derekterdi jınaýǵa, óńdeýge bergen kelisimin qaıtaryp alýǵa quqyly.
Іshki bólshek saýda sýbektileri úshin ıdentıfıkatsııalyq quraldardy oqıtyn baqylaý-kassa mashınalaryn paıdalaný arqyly operatsııalardy esepke alý jóninde talap qoıa otyryp, taýarlardy tańbalaý mehanızmi jetildirildi.
Birqatar túzetýler nátıjesinde aqparattyq qaýipsizdikti qamtamasyz etý talaptary kúsheıtildi.
Aıta keteıik, zańnyń mátini baspasózde jarııalanady.
Budan buryn Prezıdent Qazaqstan men Marokko arasyndaǵy quqyq máselesine qatysty birqatar zańǵa qol qoıǵanyn jazǵanbyz.