Taza Qazaqstan: 1000 túp aǵash kósheti otyrǵyzyldy
ORAL. KAZINFORM – Oral qalasynda «Taza Qazaqstan» respýblıkalyq ekologııalyq aktsııasy aıasynda 1000 túp aǵash kósheti otyrǵyzyldy. Igilikti is-sharaǵa Batys Qazaqstan oblysynyń ákimi Narıman Tóreǵalıev, qoǵam belsendileri, ardagerler men jastar atsalysty.
Jınalǵandar aldymen Shaǵan ózeniniń jaǵalaýyn tazalap, abattandyrdy. 500-den astam adam qatysqan aktsııada qaraǵaı, úıińki, súmbil terek, shaǵan aǵashtarynyń kóshetteri otyrǵyzyldy.
Aımaq basshysy Prezıdent tapsyrmasyna sáıkes «Taza Qazaqstan» respýblıkalyq ekologııalyq aktsııasy óńirde keń kólemde júzege asyrylyp jatqanyn aıtyp, qoǵamda ekologııalyq mádenıetti qalyptastyrý men tabıǵatty aıalaýdyń memlekettik mańyzyna toqtaldy.
- 2024 jyldyń sáýir aıynan beri senbilikterge 500 myńǵa jýyq batysqazaqstandyq qatysty, 221 myń gektar aýmaq tazartyldy, 172 myń tonna qatty-turmystyq qaldyqtar arnaıy polıgondarǵa shyǵaryldy, 313 085 túp aǵash egildi. Aýqymdy kógaldandyrý aıasynda keıingi 5 jylda oblystaǵy memlekettik orman qory aýmaǵynda 41 mln dana aǵash, al eldi mekenderde 727 myń dana aǵash otyrǵyzyldy. Tabıǵatty qorǵaý – qur sóz emes, ol barshamyzdyń ortaq boryshymyz. Halyqtyń ómir sapasyn jaqsartý men aınalany kórkeıtý baǵytyndaǵy jumystar aldaǵy ýaqytta da júıeli túrde jalǵasady, - dedi Narıman Tóreǵalıev.
Aktsııa óńir aýdandarynda da uıymdastyryldy. 120000 myń adam belgilengen aýmaqtardy kóń-qoqystan aryltyp, tal-terekter otyrǵyzdy.
