Qazaqstan kiristerdi jylystatýǵa qarsy kúres jónindegi halyqaralyq ortalyq qurýǵa qatysady

ASTANA. KAZINFORM – Memleket basshysy «Qylmystyq jolmen alynǵan kiristerdi zańdastyrý (jylystatý) jáne terrorızmdi qarjylandyrý qaýip-qaterine baǵa beretin halyqaralyq ortalyqty qurý týraly kelisimdi ratıfıkatsııalaý týraly» Qazaqstan Respýblıkasynyń Zańyna qol qoıdy.

Bul týraly Aqordanyń baspasóz qyzmeti habarlady.

Zańnyń mátini baspasózde jarııalanady.

Senattyń jalpy otyrysy ótip, onda senatorlar elimizden zańsyz shyǵarylǵan qarajatty qaıtarýǵa yqpal etetin halyqaralyq ortalyq qurý týraly kelisimdi talqyǵa salatynyn jazǵan bolatynbyz.

Senat qaraıtyn «Qylmystyq jolmen alynǵan kiristerdi zańdastyrý (jylystatý) jáne terrorızmdi qarjylandyrý qaýip-qaterine baǵa beretin halyqaralyq ortalyqty qurý týraly kelisimdi ratıfıkatsııalaý týraly» zańdy Májilis osy jyldyń 24 qyrkúıeginde qabyldaǵan bolatyn. Sol kezde zań jobasy boıynsha negizgi baıandama jasaǵan Qarjylyq monıtorıng agenttigi tóraǵasynyń orynbasary Jeńis Elemesov atalǵan kelisimge Memleket basshylary 2023 jyldyń qazan aıynda qol qoıǵanyn eske saldy.

Kelisim derekterdi qorǵaý jónindegi talaptardy saqtaı otyryp, TMD-ǵa qatysýshy elderdiń qarjylyq barlaý bólimsheleri arasynda jedel aqparat almasý maqsatynda biryńǵaı aqparattyq keńistik pen ınfraqurylymdy qalyptastyrýǵa baǵyttalǵan. Sonymen qatar aqshany jylystatýdyń jáne terrorızmdi qarjylandyrýdyń aldyn alý jáne oǵan qarsy kúres maqsatynda halyqaralyq standarttar men usynymdardy ázirleý jáne engizý, qarjy monıtorıngi jáne qaýipterdi baǵalaý salasyndaǵy mamandardy oqytý jáne olardyń biliktiligin arttyrý jónindegi erejeler bar. Sondaı-aq qarjy ınstıtýttary, quqyq qorǵaý organdary jáne basqa da múddeli taraptar arasyndaǵy yntymaqtastyqty nyǵaıtý da qarastyrylǵan.

Buǵan deıin Terrorızmdi qarjylandyrý qaýipterin baǵalaýdyń halyqaralyq ortalyǵy qurylatynyn jazǵan edik.