Memleket basshysy jańa Konstıtýtsııadaǵy adam quqyqtary bóliminiń ereksheligin túsindirdi
ASTANA. KAZINFORM – Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda Konstıtýtsııanyń 1995 jylǵy nusqasynyń mańyzdylyǵy, sondaı-aq jańa Konstıtýtsııadaǵy adam quqyqtary bóliminiń ereksheligi týraly aıtty.
– 1995 jylǵy Konstıtýtsııada memlekettik bılikti nyǵaıtýǵa basymdyq berildi. Sol zamannyń bıiginen qaraǵanda, bul oryndy edi. Óıtkeni Táýelsizdiktiń eleń-alańynda zań shyǵarý qyzmetin qamtamasyz etý qajet boldy. Qoldanystaǵy Konstıtýtsııany synǵa alýdyń qajeti joq. Óıtkeni bul qujat memleketimizdiń irgesin bekemdeýge oń yqpal etti.
Biz Ádiletti Qazaqstandy quryp jatyrmyz. Sondyqtan Qazaqstan Respýblıkasynyń tuńǵysh Prezıdenti Nursultan Ábishuly Nazarbaevtyń erekshe tarıhı eńbegin umytpaǵanymyz lázim. Qazirgi qoǵam ómirinde «Adam memleket úshin emes, memleket adam úshin» degen qaǵıdattyń ózektiligi artty. Sondyqtan jańa Konstıtýtsııanyń boıynan osy ustanym anyq ańǵarylady. Adamnyń quqyqtary men bostandyqtaryn qorǵaýǵa 30 baptan turatyn eń úlken bólimniń arnalýy tegin emes. Bul – Ata zańnyń shamamen úshten biri. Salystyrmaly túrde aıtsaq, Prezıdent týraly bólim nebári 10 baptan turady. Azamattarymyzdyń quqyǵyna qatysty kóptegen normaǵa jańa mazmun berilip, mán-mańyzy arta tústi. Elimizdiń tarıhı-mádenı murasyn, otbasylyq jáne adamı qundylyqtardy kózdiń qarashyǵyndaı saqtaıtynymyzdy Ata zań deńgeıinde aıqyndadyq. Bul – halqymyzdyń ajyramas quqyǵy. Eshbir saıasatkerdiń, ıá bolmasa qoǵam belsendisiniń, sheteldik nemese otandyq úkimettik emes uıymnyń eshqashan buǵan kúmán keltirýine, synap-mineýine qaqysy joq. Oǵan jol bermeımiz.
Halqymyzdyń basym bóligi otbasyn qoldaý baǵytyndaǵy memlekettik saıasatty quptaıdy. Óıtkeni otbasy degenimiz – ulttyń jańa qasıetin qalyptastyryp, adal azamatty tárbıelep shyǵaratyn altyn uıa. Azamattarymyzdyń múddesin qorǵaý – eń mańyzdy memlekettik mindet. Saıyp kelgende, bul egemendigimizge, ultymyzdyń baıandy bolashaǵyna qatysty másele, - dedi Memleket basshysy.
Eske sala keteıik, buǵan deıin Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda sóz sóılegenin jazǵanbyz.
