Memleket basshysy Jambyl oblysynyń ákimi Erbol Qarashókeevti qabyldady
ASTANA. KAZINFORM — Prezıdentke Jambyl oblysynyń byltyrǵy áleýmettik-ekonomıkalyq damýy týraly esep berildi.
Qasym-Jomart Toqaevqa ótken jyldyń qorytyndysy boıynsha oblystyń negizgi makroekonomıkalyq kórsetkishterinde oń dınamıka baıqalatyny jóninde baıandaldy. Atap aıtqanda, negizgi kapıtalǵa quıylǵan ınvestıtsııa 17,3 paıyzǵa artyp, 517,2 mıllıard teńgeni quraǵan. Sondaı-aq kólik tasymaly salasy – 5,2 paıyz, qurylys – 18,7 paıyz, baılanys – 7,2 paıyz, paıdalanýǵa berilgen turǵyn úı kólemi – 4,7 paıyz ósken.
Erbol Qarashókeevtiń aıtýynsha, 2023 jyly oblysta jalpy quny 75 mıllıard teńge bolatyn 13 jańa óndiris iske qosyldy. Bıyl jalpy somasy 180 mıllıard teńgeden asatyn taǵy 28 jobany iske asyrý josparlanyp otyr. Jalpy, ınvestıtsııalyq jobalar pýlyna quny 2,3 trıllıon teńgeni quraıtyn 69 joba engen. Olardy iske asyrý arqyly 5,5 myń adamdy jumyspen qamtýǵa bolady.
Prezıdentke shaǵyn jáne orta bıznes sýbektileri 864,9 mıllıard teńgeniń ónimin óndirgeni jóninde málimet berildi. Atalǵan salada jumyspen qamtylǵandar sany 18,5 paıyzǵa artqan.
Sonymen qatar Qasym-Jomart Toqaevqa oblystaǵy agroónerkásip kesheniniń damý barysy jóninde aıtyldy. Óńirde sý sharýashylyǵy nysandaryn salý jáne jańǵyrtý jumystary júrip jatyr. «Aýyl amanaty» baǵdarlamasy aıasynda bıyl sý únemdeý jáne balyq sharýashylyǵyn damytý jobalaryna qosymsha qarjy bólinedi.
Oblys ákimi aıtýynsha, byltyr 2030 oqýshyǵa arnalǵan 7 mektep paıdalanýǵa berilgen. Al bıyl 13 380 orynǵa eseptelgen 29 bilim berý nysanynyń qurylysy bastalady. Onyń ishinde 12 bilim ordasy «Jaıly mektep» ulttyq jobasy aıasynda salynbaq.
Budan bólek, 19 densaýlyq saqtaý nysany, sonyń ishinde Taraz qalasynda oblystyq onkologııalyq dıspanser jáne Shý aýdanynda balalardy ońaltý ortalyǵy ashyldy.
Kezdesý sońynda Qasym-Jomart Toqaev Jambyl oblysy ákimine óńirdi áleýmettik-ekonomıkalyq turǵydan odan ári damytýǵa jáne turǵyndardyń tabysyn arttyrýǵa baǵyttalǵan birqatar tapsyrma berdi.
